Nukiga Københavnimi, Aarhusimi, Aalborgimi aamma Odensemi nipilersornikkut festivalertitsilerpat, kalaallit nipilersoqatigiit arfinillit tusarnaartitsisuussapput.

Soqutiginninneq annertooq

- Spot Festival Aarhusimi siorna ingerlanneqarmat Spot On Greenland aaqqissuupparput. Nipilersornermik suliaqartunit, tusagassiorfinnit aamma tusarnaartut akornanni aaqqissuussamutsoqutiginninneq annertooq misigivarput. Matut ammarneqnnginnerini ulikkaaqqalluta nalunaarutigisariaqarnikuuarput, tusarnaariallu amerlasuut ingerlaannartariaqarnikuullutik. Taamaattumillu Danmarkimi illoqarfinnut anginernut siammarterniarlugu aalajangernikuuvugut. Kalaallinut nipilersortartunut nutaanut soqutiginninneq annertuvoq, suliniummik ataqatigiissaarisoq Michael Skaarup, tusagassiuutinut nalunaarummi allappoq.

Bilitsip akia

Bilitsip akia 100 koruuninut inissinneqarsimavoq, tuniniaanerlu billetto.dk-mi, Kalaallit Illuutaanni aamma Nordatlantens Bryggemi aallartereerluni.

Spot on Greenlandimik aaqqissuisuupput Nukiga, Spot Festivalen, Nordatlantens Brygge, Nordatlantisk Hus aamma Aalborgimi Studenterhuset.

Tusarnaartitsinissamut pilersaarut:

• Pingasunngorneq 9. maj - Odense – Nordatlantisk Hus
• Sisamanngorneq 10. maj - Aarhus – Atlas
• Tallimanngorneq 11. maj - Aalborg – Studenterhuset Aalborg
• Arfininngorneq 12. Maj - København – Nordatlantisk Brygge

Nipilersortussat

Small Time Giants (indie/rock)

Small Time Giants kalaallit nipilersortartutut allaanerusutut isigineqarput. Nunatsinni nunani allanilu tusarnaartitsinerit nersualaarneqartut takutippaat, nipilersoqatigiit anersaaqarlutillu nipilersorfimmi qanoq iliortarnerat oqaatigiuminaattarpoq.

NINA (elektro/pop)

NINA Kalaallit Nunaanni erinarsortartut tusaamaneqarnerpaat ilagaat. Nunani avannarlerni nipilersortartut arlallit suleqatigalugit 2016-imi nuuteeraliani ”Hun står i nordenvind” elektroniskiusoq saqqummersippaa.

Nick Ørbæk (rock/pop)

Nick Ørbækip siullermeerluni saqqummersitaa ”Saappara” februaarimi 2018-imi saqqummerpoq. Saqqummersitaq pitsaasumik nalilerneqarpoq, tamannalu Kalaallit Nunaanni kisimiilluni tusarnaatitseqattaarneranik kinguneqartitsivoq. Nick Ørbæk nutaaliortumik aamma qalipaatigissaartumik rock/popimik nipilersortarpoq.

Da Bartali Crew (electro/house/hiphop/ambient)

Da Bartali Crew elektroniskiusumik nipilersoqatigiiupput, Nuummi tusarnaartitsisarnermit Kalaallit Nunaanni nuannarineqarnerpaat ilaannut ilannguttut. Da Bartali Crewikkut tusarnaartitsinermit YouTubemi videoliaat ‘’DBC’’ 120.000-nit amerlanerusunit isiginnaarneqarsimavoq.

Ulf Fleischer

Ulf Fleischer kalaallit erinarsortartut tusaamaneqarnerpaat ilagaat. Nipilersukkanik nuannarineqartuartunik arlalinnik peqarpoq, tamatumalu kalaallit nipilersugaataannut iluatinnartunut annertuumik ilaalersissimavaa.

Simon Lynge

Qallunaaq/kalaaleq erinarsortartoq nunarsuarmit tamanit tusarnaartartunut sunniilluartarpoq. Simon Lyngep nuuteeraq ‘’The Map Of Your Life’’ saqqummersitani kingulleq 2016-imi saqqummersippaa, taanna nunani tamalaani nalilerluarneqarnikuuvoq.