Nuannaralugu assiliisartoq Jesper Kunuk Egede Narsaminngaanneersoq, Maria Katona aamma Tamás Farkas Budapestiminngaanneersut peqatigalugit Avannaani, Tunumi, Kujataani Kitaanilu assilisarisimasatik saqqummersippaat.

Saqqummersitsineq Flagmuseetimi Budapestimiittumi marlunngormat ammarneqarpoq.

Nuna tamakkerlugu assilisat

Maria aamma Tamás tamarmik Kalaallit Nunaanniissimapput nunalu nuannareqaralugu.

- Budapestimut nuukkama Budapestip iluani assilisanik saqqummersitseqqullunga Maria neqeroorpoq. Taakku pillugit Flagmuseet tusagaqarpoq, tassanilu saqqummersitserusussinnaanersunga aperaannga, Jesper Kunuk Egede, ukioq ataaseq qaammatillu arfinillit Budapestimi najugaqarsimasoq, oqaluttuarpoq.

- Mariap Ilulissaniinnermini Tamásillu Avannaaniinnermini assilisarisimasaat ilanngullugit, Kujataani nunatat Ilulissallu eqqaani siku aammalu Tunumi qaqqat inngingissuniit Qaanaami piniartunut maanna takusassiarisinnaavagut.

Jesper Jonas Brogaard Nuumminngaanneersoq peqatigalugu 2017-imi Ungarnimi aqqaneq-marloriarluni saqqummersitsivoq, inuillu 10.000-nit amerlanerusut saqqummersitat aqqutigalugit nunap isikkua takuaat.

Issittoq Europa qeqqani soqutigineqartoq

Tamás Farkas tallimariarluni Kalaallit Nunaanniissimavoq arlaleriarlunilu Qaanaamiittarsimavoq avannamullu Etah ilanngullugu tikisissimallugu. Saqqummersitsinerup ammaanersiorneqarnerani silap kissatsikkiartornerata kinguneranik inuuniarnikkut atukkat oqimaatsut piniartunit atorneqartut, Tamásip oqaluttuarai.

Issittumut soqutigisaqarnermini Issittumi sumiiffiit arlallit tikittarsimavai, aammalu nuliani Zsófi Müller peqatigalugu ilusilersuisarfik Four Whales, tujuuluaraliortarfik, ilaatigut Nuummi Tupilak Travelimut aamma Ilulissani PGI Greenlandimut tuniniaasartoq ammarsimavaat.

Maria Katona aamma Issittumut assut soqutigisaqarpoq tamaammat Islandimiissimallunilu Kalaallit Nunaanniissimavoq. Taassuma saniatigut Central European Polar Association Issittumi nunat Europallu qeqqani piorsarsimasutsikkut avitseqatigiinnermik suliaqartarfiat, pilersissimavaa siulittaasuullunilu.

Kalattuut aamma inuiattut erinarsuutit

Saqqummersitsinerup ammaanersiorneqarnerani oqalugiartoqarpoq. Najukkamilu inuusuttut qitittartut youtubemi kalattoortunik isiginnaartarsimallutik ilikkarsimasatik takuttunut takutitsinerat saqqummersitsinerup aammaanersiornerani pisuni pingaarnerpaavoq.