Kangerlussuaq Narsarsuarlu pillugit Naalakkersuisut suli erseqqissumik oqaaseqarumanngitsut
Kangerlussuup aamma Narsarsuup siunissaanut tunngatillugu, naalakkersuisoq Simon Simonsen kommunini suleqatigiissitanut innersuussivoq
Mittarfiliortiternissamut pilersaarut akuerineqassappat, nunaqarfiit mittarfeqarfiusut Kangerlussuaq aamma Narsarsuaq qanoq pineqarnissaannik Naalakkersuisut suli erseqqissumik akissuteqanngillat. Tillie Martinussenip (Sul) §37 naapertorlugu apeqquteqaataanut attaveqaqatigiinnermut naalakkersuisup Simon Simonsenip (S) akissutaani tamanna atuarneqarsinnaavoq.
- Kommunit attuumassuteqartut suleqatigiissitaliorput, mittarfiit nutaamik ilusilerneqarnissaat eqqarsaatigalugu nunaqarfiit ineriartortitsinermi ingerlaqqiffigisinnaasaannik misissuisussanik.
Tillie Martinussenip (Sul) aamma nunaqarfinnut taakkununnga marlunnut tunngatillugu mittarfiliortiternissamut pilersaarut qanoq akeqarnissaa apeqqutigaa.
- Inuiaqatigiinni aningaasaqarnermik misissueqqissaarnermi alloriarneq 2 innersuussutigineqarpoq, tassanilu mittarfiit ilusissaattut siunnersuutigineqartumi inuiaqatigiit aningaasaqarnerat aamma nunap karsiata aningaasaqarnera allaaserineqarput. Tamatuma saniatigut inatsisissatut siunnersuut innersuussutigineqarpoq, taama akissuteqartoqarpoq.
Periarfissat marluinnaat atorlugit naatsorsorneqartoq
Tamannali akissut paasissutissanik marlunnik toqqugaqarpoq, taakku immaqa qiviaqqaarnermi takuneqarsinnaanngillat.
Siullermik inuiaqatigiit aningaasaqarnerannut atatillugu misissueqqissaarneq periarfissat marluinnaat atorlugit Kangerlussuaq aamma Narsarsuaq misissorneqarput. Ataatsimi mittarfiit heliportinngorneqarnissaannut tunngasoq, ataaserlu Kangerlussuarmi mittarfiup 1.500 meterisut takissuseqartillugu attanneqarnissaanut tunngasoq.
Narsarsuup heliportinngorneqarnissaanik piumaqarneq Naalakkersuisut akuerigaa akissummiippoq, kiisalu Kangerlussuup mittarfia naalisinneqarluniluunniit heliortinngortinneqarnissaa.
Qeqqata Kommuniata nalunaarutigereerpaa, kommunip Kangerlussuaq tigunissaanut piareersimalluni, mittarfiullu takissusaa atorlugu ingerlatsisinnaalluni. Siumup Inatsisartuni gruppiata tamanna kissaatigineqartoq taperserlugu oqaatiginikuuaat.
Kisianni inuiaqatigiit aningaasaqarnerannut atatillugu misissueqqissaarnermi taamatut aaqqiisoqaranut tunngasumik naatsorsuisoqarnikuunngilaq.