Qaqqap ilarujussua Karrat kangerluani sisooriaannaasoq, suli sukkasuumik nikikkiartorpoq. Tamanna nalunaarusiaangallartumi Upalungaarsimanermut ataatsimiititaliamit tiguneqaqqammersoq takutinneqarpoq.

- Sisoorsinnaanera suli navianaateqartupilussuuvoq, taamaammat eqqaani angallattoqanngilluinnarnissaa suli innersuussutigaarput, naalakkersuisoqarfimmi pisortaq Mette Skarregaard Pedersen Sermitsiaq.AG-mut oqarpoq. Taanna Upalungaarsimanermut ataatsimiititaliami aamma siulittaasuuvoq.

Qaqugukkulluunniit sisoorsinnaasoq

Ukioq kingulleq juunip qaammataani tassaarsuaqarnerata kingorna nunap sisoortup kangisissortaani allamik sisoortoqarsinnaanera aamma inerniliunneqarpoq.

Tassaarsuaqqissinnissamik navianassutsip kinguneranik Nuugaatsiami Illorsuarnilu innuttaasut utersinnaanngillat. Sulilu taama navianartigisoqartoq, uuttuinerit nutaat takutippaat.

- Qaqqap ilarujussua aqagu ukiulluunniit qulit qaangiuppata sisoorsinnaavoq, Mette Skarregaard Pedersen oqarpoq.

Navianassutsimik uuttuummi 12-imut killittumi 11,5-imimi inissisimanera navianaateqartupilussuuvoq.

Nikittuartoq

Piffissami kingullermi sumiiffimmi allamik sisoortoqarsimanera oqaatigineqartarpoq. Tamannalu tunngavigalugu Upalungaarsimanermut ataatsimiititaliaq schweizimi suliffeqarfik Karrat kangerluani qaammataasiaq atorlugu assinik nakkutiginnittoq nalunaarusiornissaanik qinnuigisimavaa. Allamilli sisoortoqarsimannginnera nalunaarusiaangallartumi inerniliunneqarpoq. Qaqqalli ilaa suli nikittarpoq.

- Nikikkiartornera suli sukkasuupilussuuvoq. Qaqqap ilaa ullormut agguaqatigiisillugu 1 centimeterimik nikittarpoq. Katillugu 40-50 meterinik nikissimanissaa ilimagineqarpoq. Upalungaarsimanermut ataatsimiititaliaq piffissami qanittumi nalunaarusiamik tamakkiisumik tigusaqarnissani naatsorsuutigaa.

Qanoq pisoqarneranik misissuineq

Upalungaarsimanermut ataatsimiititaliamiillu politiit Issittumi Sakkutooqarfimmik suleqateqarluni sumiiffimmi inunnik angallattoqarsimasinnaaneranik takussutissaqarnersoq misissueqqullugit qinnuigisimavai. Sumiiffimmimi angallanneq inerteqqutaanngikkaluarluni, taamatut iliornissaq isumatusaarnerunngilaq.

Sumiiffimmilu angallattoqarsimaneranik takussutissaqanngitsoq, nalunaarutigineqarpoq.

- Sumiiffimmi angallattoqannginnissaanik innersuutigisimasarput tusarneqarsimanera assut nuannaarutigaarput, Mette Skarregaard Pedersen oqarpoq.