KNAPK-p Sulisitsisut peqatigalugit ”pisassat 40 procentit nunanut allanut tuniniarneqartussanngorlugit isumaqatigiissuteqarnikuugaluarmata”, Henrik Sandgreenip tusagassiuutinut nalunaarummi akerlilerpaa. Ippassaq unnukkut Qanoruumi Hans Enoksenip tamanna oqariartuutigimmagu.

Erseqqissaaneq

Henrik Sandgreen erseqqissaassuteqartariaqartutut misigivoq.

- KNAPK ataasinnguamilluunniit oqarnikuunngisaannarmat, pisassat nunanut allanut tuniniarneqarsinnaagaluartut.

- Aalisarnermut inatsisissatut suliarineqaraluartumi KNAPK peqataavoq, sulinerup ilaani Copenhagen Economics ataqatigiissaarisuliullugu sulinermi, nunami allamiut nunatsinni ingerlatsivinni imaani aalisartitsinernik piginneqataasinnaanerat sammineqarpoq, Henrik Sandgreen nassuiaavoq.

Raajarniarnermi nunami allamiut piginneqataasinnaangivinnerat inatsimmi naqissuserneqarpoq, tamatumalu allanngorneqannginnissaa isumaqarfigineqarpoq. 

49 procentinit 40 procentinut

- Aalisarnerit allat tamaasa eqqarsaatigalugit maannamut nunatta avataanersuut  ingerlatsivinni, tassa selskabini, 33 procent tikillugu piginneqataasinnaapput. Taassumap eqqartornerani kisitsit anginerusoq eqqartorneqartaraluartoq, allat 49 procent tikillugu, naapitsiffittut innersuussutaavoq 40 procentimik piginneqataasinnaaneq, Henrik Sandgreen oqarpoq, nangillunilu:

- Kisitsisip anginerunnginneranut ataqqinaat KNAPK-miit eqqissiivilluta tiguseqataaffigisinnaavarput, aalisartut siulittaasut oqarpoq, ‘’KNAPK isumminngisaarnarsimavoq kiilu ataasiinnarluunniit nunami allamiunut tuniniarneqassasoq’’ taassuma erseqqissaatigaa.