Meeqqat atuarfiisa ingerlanneqarnerat kommuniniit akisussaaffigineqarput. Meeqqallu atuarfiinik paaqqinnittarfinnillu sanaartornerit aserfallatsaaliinerillu Namminersorlutik Oqartussanit akisussaaffigineqarlutik. Taamatulli suliassanik agguataarinninneq isumassarsialatsiaasimanngitsoq, naalakkersuisoqatigiit isumaqarput.

- Tamanna pisariaqanngitsumik ataqatigiissaarinermik allaffissornermillu pisariaqartitsilernermik nassataqarsimavoq, meeqqat atuarfiata tamatumalu siuliata ingerlanissaanik avatangiisinik pitsaasunik qulakkeerinissamut suliassanik pisariaqartinneqarnerpaanik pingaarnersiuinissamik naammassinninnissamillu kinguaattoornernik kinguneqarsimasumik, taakku 2018-imut aningaasanut inatsit isumaqatigiissutiginerani allapput.

Taamaammat sanaartortitsinerit, aserfallatsaaliinerit ingerlatsinerillu kommuniniit akisussaaffigineqalissapput.

Aningaasat atuarfiliortitsinermut atugassatut immikkoortinneqarsimasut kommuninut tapiissutinngorlugit nuunneqassapput.

- Illuatungeriit iluarisimaarpaat, meeqqat atuarfiinut tamatumalu siuliinut suliassaqarfimmut kivitsinissamik qulakkeerinissamut peqataasussamik, kommunit matumuuna sivisunerusoq eqqarsaatigalugu tamakkiinerusumillu isiginnilluni suliassaqarfinnut pilersaarusiornissamut pitsaanerusunik periarfissaqalissammata, naalakkersuisoqatigiit isumaqatigiissummi nangillutik allapput.