Kommunit avissaartuutileruttortut Kanukoka atorunnaalerpoq
Mittarfiliornissamik pilersaarutit, naligiissaarinermik aaqqissuussineq, suliffinnik nussuineq kommunillu aaqqissuuteqqinnerisa siuariartunnginnera avissaartortitsipput – Kommuneqarfiit kattuffiat juulip 31-anni atorunnaassaaq
Kanukoka marlunngornermi juulip 31-anni ukiut 46-t kommuninut kattuffioreerluni matussaaq.
Taamaasilluni nunami kommunit sanngiitsumik inissisimalerput – minnerunngitsumik Namminersorlutik Oqartussanut atatillugu, kommunit imminnut saqitsaatsikkuminarnerulersissagamikkit, piffissamilu matumani kommunit iluanni suliniuteqartoqarpoq, kommunit suleqatigiinnissaannut periusissamik nutaamik pilersitsiniarluni.
Sermitsiaq taama allaaserisaqarpoq.
Peqatigiiffik peqatigiilluarfiusoq periarfissaarpasinngilaq, partiit akornanni pissanganartorsiortarnerit pissutigalugu.
– Kommuneqarfik Sermersooq sunik tamanik, suleqatigiinnissamik isumassalinnik, suleqatiginnikkusuppoq. Assersuutigalugu Kommune Kujalleq aamma Kommune Qeqertalik pisiortornikkut suleqatigaavut, tassuunakkullu ukiut tamaasa millionilinnik sipaaruteqartarpugut, Kommuneqarfik Sermersuumi borgmesteri, Asii Chemnitz Narup (IA) Sermitsiamut oqarpoq.
Illoqarfiit pingaarnersaanni kommuni siullersaalluni Kanukokamit anivoq.
– Tamanna peqatigalugu malugisimavarput kommunit akornanni namminersorlutillu oqartussanik isumaqatigiinniartarnerit ukiuni kingullerni pitsaanerujussuanngorsimasut, illoqarfiit pingaarnersaanni borgmesteri oqarpoq.
Tamanna pillugu Sermitsiami paasisaqarnerugit:
