Kræfti pillugu misissuinerup takutippaa Kalaallit Nunaat nunanut avannarlernut allanut sanilliullugu kræfteqalersartut amerleriarsimallutillu toqusartut amerlanerungaatsiartut.

Kræfteqartut 1983-imit 2014-mut amerlanerulersimasut misissuinerup aamma takutippaa. Ilisimatusarnermit ersersinneqarpoq kræfteqalersarnerup annertuseriarnera kitaamiut inooriaasiannut ikaarsaariarnermut atassuteqartoq.

Peqqissutsimut naalakkersuisoq Doris J. Jensen (S) iliuuseqarniarpoq.

- Pitsaaliuineq peqqinnerulersitsiniarnerlu kræfteqalersartut ikilisinnissaannut pingaaruteqarluinnarput. Innuttaasut peqqissuunissaannik suliniut Inuuneritta II pillugu suleqatigiinneq pitsanngorsassavarput, tamatumanilu pujortartarnerup imigassartortarnerullu pitsaaliorneqarnissaat peqqinnartunillu nerisaqarnerulernissaq ukkatarineqarpoq, Doris J. Jensen oqarpoq.

Peqqinnissaqarfik misissorneqassaaq
Kræftip innuttaasuni peqqinnissaqarfimmilu ukkatarineqarnerunera pissutigalugu toqusartut ikiliumaartut neriuuteqarpoq.

- Ilisimatuut arlalinnik naleqquttunik kaammattuuteqarput, taakkualu amerlanersaat sulissutigineqalereersimapput. Naalakkersuisooqatigiinnissamik isumaqatigiissummi katsorsaanissamut pilersaarutit pillugit immikkoortortaqarpoq Kræftilu pillugu pilersaarut malillugu katsorsaasarnerit pitsanngorsarnissaat pimoorullugu sulissutigineqarluni. Peqqinnissaqarfitta tatineqarnera isertugaanngilaq, tamatumanngalu ersersinneqarpoq kræfti pillugu iliuuseqarneq assut pingaartinneqartoq.

- Tamatuma saniatigut isumaqarpunga innuttaasut kræfteqarnermut siusissukkut takussutissaasut pillugu paasisaqarlutillu ilisimasaqarnissaat pingaaruteqartoq, peqqissutsimut naalakkersuisoq oqarpoq.