Skip to main content

Kruse suli isertuussisoq

Aalisaernermut inatsimmik nutaamik suliaqarnermut atatillugu kammeradvolatip nalunaarusiaq suliarisimasaa, aalisarnermut ataatsimiititaliap tigunavianngilaa.

Naaka aalisarnermut inatsit inuiaqatigiit aningaasaqarnerannut immikkut pingaaruteqalersinnaagaluartoq, aalisarnermut piniarnermullu naalakkersuisup Karl Kristian Krusep taamaalilluni paasissutissat tigummiinnarallarpai.

Taarsiinissamut piumasaqaat
Killiligaanngitsumik pisassiissutit atorunnaarsinneqarnerisigut inuussutissarsiortunik taarsigassiinissamut piumasaqaateqartoqarnerani, inatsisitigut aamma taarsiinissamut qanoq isumaqarnissaa kammeradvokatip nalilertussaanikuuaa.

Nunap karsianit taarsigassiisoqaratarsinnaaneranut kammeradvokati qanoq isumaqarnersoq, ataatsimiititaliaq februaarimi ataatsimiinnermini paasitinneqartoq, eqikkaaneq kisiat pissarsiarissagaa.

Tunniunneqassanngitsoq
Nalunaarusiaq tunniunneqassanngilaq, naak taakku politikerit inatsisissatut siunnersuummi suliaqarnermi qitiusumik suliaqartussaagaluartut, tassani ilaatigut akileraarutitigut isertitassanit millioninik pingasunik kisitsisitalinnik annaasaqarfiusussasut aalisarnermut naalakkersuisoqarfiup atorfilittaasa nalilernikuuaat. Inuussutissarsiuteqartullu milliardinik taarsiiffigineqarnissamut piumasaqaateqarnissartik kalerriutigereerpaat.

Isertuussiffigineqartut
Innuttaasut, tusagassiorfiit aamma qinikkat kammeradvokatip qanorpiaq naliliisimaneranik isertuussiffigineqarput. Inatsisartunut ilaasortat taamaalillutik aalisarnermut inatsisip nutaap nunap karsianut aamma naggataagut kalaallit inuulluataarnerannut qampq akeqassaneranik naliliinissamut ajornakusoortitsissallutik.

Sulisitsisut (GE) Krusep isertuussiniakujunneranut sakkortuumik isornartorsiuipput.

- Sulisitsisut marloriarlutik allagaatinik takunnikkumallutik qinnuteqarnikuupput, assigiinngitsorujussuarnillu marlunnik tunngavilersuiffigineqarlutik, tamanna imminermi nangaanartoqarpoq: Allagaq pineqartoq politikerinut suli saqqummiunneqarsimanngimmat siullermik itigartinneqarput. Appassaanik inatsisissatut siunnersuutip Inatsisartunut nassiunneqarnerata kingorna tunngavilersuut allaavoq, tassa aalisarnermut inatsit taamaatsillugu akuerineqassappat aamma pisassiissutit atorunnaarsinneqarpata kilisaataatillit ilaat taarsigassiinissamik piumasaqarniarlutik nalunaarsimammata. Aamma kammeradvokatip nalunaarusiaa taamaammat allatorluinnaq isumaqalermat, Sulisitsisut pisortaat Brian Buus Pedersen Sermitsiaq.AG-mut oqarpoq.

Ingasattumik qaangiiginnarneq
- Innuttaasut, tusagassiorfiit aamma Inatsisartunut ilaasortat kammeradvokatip taarsigassiinissamut suliakkiisoqaratarsinnaanera nammineerlutik takullugu nalilersorsinnaanngilaat. Kikkut tamarmik - Naalakkersuisut pinnagit - allakkamut tassunga pingaarutilimmut takunneqqusaanngillat, Naalakkersuisut oqaasii taamaallaat tusarsinnaallugit. Naak aamma Inatsisartut qitiusumik inatsimmut nutaamut kalaallinut inuiaqatigiinnut naapertuutinngitsumik kinguneqannginnissaanik akisussaaffeqaraluartut, Sulisitsisuni pisortaq ernumasorujussuaq oqarpoq, tassani kikkut tamarmik ingasattumik qaangiinnarneqartut taanna isumaqarpoq.

Nipaalluinnartoq
Kammeradvokatip nalunaarusiaa politikerinut sooq isertuunneqarnersoq paasiniarlugu Sermitsiaq.AG Karl Kristian Krusemut apeqqutinik arlalinnik nassiussinikuuvoq. Naak apeqqutit qaammat ataaseq sinnerlugu naalakkersuisup allattaanut nassiunneqarnerannit qaangiutereeraluartoq, Sermitsiaq.AG suli akissutinik pissarsinngilaq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

MEST LÆSTE

SENESTE NYHEDER