Kuannersuarni suliniutip nunarsuarmiunut kingornussassaqarfik aarlerinartorsiortikkaa
Kuannersuarni aatsitassarsiorfiliornissamik suliniut eqeersimaartumik ingerlanneqartoq Kujataata qanittumiittup nunarsuarmiunut kingornussassaqarfittut allassimaffimmit peerneqarneranik kinguneqarsinnaavoq. Taama avatangisiit pillugit suliniaqatigiiffik NOAH, nunarsuarmiunut kingornussassaqarfiit pillugit komitemut maanna saaffiginnilersoq, nalunaarpoq.
Avatangiisit pillugit suliniaqatigiiffik Noah isumaqarpoq, Kuannersuarni aatsitassarsiorfiliornissamik suliniut Unescop Kujataani nunarsuarmiunut kingornussassaqarfianut qanippallaartumiittoq. Aatsitassarsiorfiup ingerlanneqartup nunarsuarmiunut kingornussassaqarfik aarlerinartorsiortilerisnnaavaa. Noah avatangiisillu pillugit suliniaqatigiiffiit nunatsinniittut arlallit ilaatigut Urani Naamik aamma Nuup Kangerluata Ikinngutai isumaqarput, nunarsuarmiunut kingornussassaqarfik allaat Narsamut eqqaanullu Kuannersuarnullu annertusineqartariaqartoq.
Aviisi Sermitsiaq allappoq.
Pujoralak aatsitassarsiorfimmeersoq
- Imminut aperisariaqarpoq, sooq Landnamsgården, Narsap iluani oqaluffik sumiiffiillu allat Narsap eqqaaniittut, Kalaallit Nunaanin nunalerinermik kulturimut ullumikkut atuuttumut ineriartortitsinermut pingaaruteqarsimaqisut, sooq nunarsuarmiunut kingornussassarsianut ilaariinnginnersut, Narsami Urani Naamip siulittaasua, Mariane Paviasen, tusagassiuutitigut nalunaarummi allappoq ilassuteqarlunilu, tamanna Kuannersuarnut aamma tunngatillugu oqaatigineqarsinnaasoq, aatsitassanik qaqutigoortunik assigiinngitsorpassuarnik peqarnini pissutigalugu asseqanngitsuummat.
Noahmit ernummatigineqartoq tassaavoq, Kuannersuarni aatsitassarsiornermik ingerlatsisoqalerpat nunalerinermik ingerlatsinerup navianartorsiortinneqarsinnaanera aatsitassarsiorfimmit pujoralammik siammarterisoqarnera pissutigalugu Narsap eqqaaniinnaanngitsoq aammali Kujataani.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk:
