Meeqqat kinguaassiutitigut atornerlunneqarsimagunik ajornartorsiutitik kisermaattarunnaassavaat. Erngertumik ikiuisoqartassaaq. Tv-kkut qinersisoqarnissaanut oqallinnermi partiit tamarmik taama neriorsuuteqarput.

Qinigassanngortittut arfineq-marluk saallugit 29-nik ukiullip Connie Arenasip, ukiut pingasuinnaat matuma siorna kiisami ikiorneqarsimalluni ukiuni 18-ngajanni utaqqisariaqarsimalluni oqaluttuaraa. Taanna qulingiluanik ukioqarluni peqqarniitsumik atornerlunneqarsimavoq, ikiorneqarsimannginneralu inuuneranut ilungersunartumik kinguneqarsimavoq.

- Atornerlunneqarnerma kingorna ukiut marluk pingasulluunniit siulliit eqqaamasaqanngilanga, taanna oqaluttuarpoq.

Imminoriareerluni aatsaat ikiuisoqartartoq

Ikiorneqarnissamik amigaateqartarneq ulloq manna tikillugu qaqutigoortuunngitsoq, meeqqat illersuisuat Aviâja Egede Lynge ilanngutassiami oqarpoq.

- Nunatsinni angalasarnitsinni meeqqat imminoriareeraangamik aatsaat ikiorneqartartut tusaqattaartuartarparput, taanna oqarpoq.

Siumumit qinigassanngortittup Paninnnguaq Tarrak-Petrussenip ajornartorsiut ilisimalluarpaa. Taanna nammineq marloriarluni imminoriarnikuuvoq.

- Ulloq manna tikillugu meeqqat ikiorneqannginnertik pissutigalugu imminoriartarnerat akuersaarneqarsinnaanngilaq. Meeqqat inuusuttullu pisortani ingerlatinneqaqattaaginnartarput, tamanna nammineq misiginikuuara. Partiit akimorlugit tamanna suleqatigiissutiginissaanut pitsaanerulertariaqartugut isumaqarpunga, taanna oqarpoq.

Siammasissumik suleqatigiinnissaq neriorsuutigigaat

Siammasissumik suleqatigiinnissamut tunngavissaqarpasippoq.

- Conniep ikiorneqarnissaanut ukiut 18-it ingerlasimanerat akuersaarsinnaanngilara, Ole Thorleifsen (PN) oqarpoq.

- Meeqqap oqaatigineranit ingerlaannaq ikiuuttussanik piareersimasoqartassaaq, Randi Vestergaard Evaldsen (D) oqarpoq.

Tamanna aningaasaliissutinut apeqqutinut unissanngitsoq, Tillie Martinussen, Suleqatigiissitsisuneersoq oqarpoq.

- Aningaasat nassaarineqassapput.

Ikiuigasuartussat

Meeqqat pillugit inatsit nutaaq siorna akuerineqarpoq. Tassani atornerluisoqarsimaneranik nalunaartoqartillugu kommunip akunnerit 24-t iluanni qisuariartarnissaa naqissuserneqarpoq. Piffissaliussap qaangiutinnginneranili meeqqap psykologimit ikiorneqartussaaneranik tamanna isumaqanngilaq. Partiit akornanni isumaqatigiissutigineqarpoq, tassani sukaterisoqassasoq, taamaalilluni erngertumik ikiuisoqartassalluni.

Ikiuigasuartartussanik inunnik suliamik ilisimasaqartunik, ikiuiartornissamut piareersimasunik pilersitsisoqassasoq, Inuit Ataqatigiit Siunnersuutigaat.

IA aalajangiisumik sunniuteqassappat, taakku ikiuigasuartartussat kingusinnerpaamik qinigaaffiup tulliata naammassinerani piareersimassasoq, partiip qinigassanngortitaa Olga P. Berthelsen neriorsuivoq.