Meeqqat Inuunerissut ukiunik qulinngortorsiortut
Meeqqanik illersuiniaqatigiiffik meeqqat pisinnaatitaaffiinik aamma kinguaassiutitigut atornerluinerit pillugit paasititsiniaasarpoq
Meeqqat Inuunerissut/Bedre Børneliv (MIBB) pilersinneqarneranit ukiut qulit qaangiupput. Peqatigiiffik nammineq kajumissutsimik ingerlasoq paasititsiniaanertigut videotigut meeqqat atugaat pillugit iliuuseqaqqusilluni malunnartitsiniartarpoq. MIBB-imi meeqqat kinguaassiutitigut atornerlunneqarsimasut immikkut ukkatarisimavai.
MIBB 2012-imi aamma 2013-imi containerilerluni sinerissami suliniut 'Kuseriarnerup siaruarneratut' angallappaat.
Peqatigiiffik aamma meeqqat atugarliortillugit inersimasut qisuariarsinnaanerannik oqaluttuartunik paasititsiniaanernik suliaqartarsimavoq.
Nallittorsiornermut atatillugu Katuami Ikinngutigiit inaanni, sisamanngornermi 17. maj nal. 15.30 aamma 17.00 akornanni kaffisortitsinissamut MIBB qaaqqusivoq.
Videonik paasititsiniaanerit nutaat aamma pisoqaanerit takutinneqassapput, aningaasaliisartoq aalajangersimasoq STARK aamma tunniussaqaqqissaaq.
