Minik Dahl Høeghip aamma Ajax Københavnip akornanni inaarutaasumik isumaqatigiinniarnerit inisseqqammerput. Pineqartoq Minik Dahl Høegh aningaasaliisut aaqqissuinerannut annertuumut ualimut peqataanngilaq. Taanna Spaniami nunanut allanut unammisartut Amerikap nunavittaani pissartanngorniunnissamut piareersarlutik sungiusarnerannut peqataavoq. 

Aningaasaliisut, Ajax Håndbold aqutsisut, tusagasssiortut allallu soqutiginnittut Minik Dahl Høegh ilisarititsinermi videokkut isiginnaaginnartariaqarpaat.

Suliniummut pissanganartumut qilanaartoq

Minik Dahl Høegh qulanngilaq. Ajax Københavnimut nuunnini eqqortutut misigisimavoq. Minik Dahl Høegh Spaniamit oqarasuaatikkut Sermitsiaq.AG-mut ima oqarpoq:

- Skanderborg Håndbold appariannginnissaannut angusinermut peqataavunga, maannakkullu Københavnimi suliniummut soqutiginarluinnartumut qilanaarpunga. Unammilluarlunga aamma assammik arsarnermik nuannarisaqarneq uterteqqillugu, nangipporlu: 

- Soorunami ilaasa 1. divisionimi klubbimut unammisartunngorneq GOG-mut, Århus Håndboldimut aamma Skanderborgimut sæsonerpassuarni kingullernut taarsiullugu kinguariarnertut isumaqartoqarsinnaavoq. Uanga taamatut isiginngilara. Ukiuni kingullerni napparsimallungalu ajoquseqqasarnerit aqqusaarnikuuakka, maanna assammik arsarluarnissaq tullinnguuppoq, timi aamma eqqarsartaaseq pitsaanerpaamut pisillugu.

- Siornatigut pitsaassuserisimasama angoqqinnissaanut sivisunnginnissaa neriuutigaara, tamannalu Nuummi Amerikap nunavittaani pissartanngorniuunnermi angusinnaassagukku ilassaqaaq. 

Ajax Håndbold, qulingiluariarluni danskit pissartanngorniunneranni ajugaasarsimasoq, Bavnehøj-Hallenimi Københavnimi Vesterbromi unammisarfeqarput, taakkulu danskit ligaanni pitsaanerpaamut uteqqinnissartik anguniarsaraat.

Ligamukassaagut

Ajax Københavnimi sungiusaasup ikiortaa Claus Brunse qulanngilaq:

- Ligamut anngutissaagut. Taamaattumillu Minik Dahl Høegh aavarput, taanna unammisartorpassuit allat peqatigalugit angusarissaarnissarput qulakkeerinneqataassaaq, taamaalilluta qaffariarnissaq piviusunngortinneqassammat.

- Qujanartumik suliniutitsinnik upperinnittumik tunuliaquteqarpugut, taakkulu anguniakkatsinnut pisariaqartitatsinnik aningaasaliinikuupput, Claus Brunse naggasiivoq.

Danskit 1. divisionianni kalaallit unammisartut marluk

Minik Dahl Høeghip saniatigut nunanut allanut unammisartoqataa Angutimmarik Kreutzamann 1. divisionimi arsartassaaq. Taanna Køge Håndboldimi 2. divisionimi ajugaanermi kingorna qaffariarnikuuvoq.