Pingasunik mittarfiliornissat kommuninit tapersersorneqarluarpoq, tamannami ulluni kingullerni pillugu tusagassiuutinut nalunaarutit imaaginnavipput.

Nuummi Ilulissanilu mittarrfiit tallineqarnissaat Qaqortumilu mittarfiliortoqarnissaa isumalluarfigineqarpoq.

Aningaasaliissutit
Nuummi mittarfiup tallineqarnissaa qulakkeerneqarpat suliffeqarfiit namminersortut arlaqartut aningaasaliissasut Kommuneqarfik Sermersuumit sisamanngormat nalunaarutigineqarpoq.

- Akunnittarfiliorniartut, niuertut tunisassiortullu arlallit allaallumi nunani tamalaani qarasaasiatigut atortorissaarutinik suliaqartut ilaat maanna illoqarfiit pingaarnersaanni ingerlatsilersaarpoq. Tamanna isumaqarpoq suliffiit 200 namminersortunit pilersinneqassasut akileraarutitigullu isertitatigut millionit koruunit uuntritilikkaat arlallit Kalaallit Nunaannut tuttussanngorlutik, Kommuneqarfik Sermersuumi Aningaasaqarnermut Inuussutissarsiornermullu Ataatsimiititaq allappoq.

Kommune Kujallermi Kista P. Isaksen Qaqortumi mittarfiliornissaq pillugu tusagassiutinut nalunaaruteqarpoq.

- Qaqortup Narsallu akornanni mittarfiup niuerneq tunngavigalugu ingerlanneqarsinnaanera ilaasa qularaat isumaqarlutillu sinneqartoorfiusumik ingerlanneqarsinnaanngitsoq. Naliliinerli tamanna massakkut ilaasartut amerlassusiannik tunnga-veqarpoq, taavalu ilaasut 2 procentiinnarmilluunniit amerliallappata mittarfik sinneqartoorfiusumik ingerlanneqarsinnaangussaaq, Kiista P. Isaksen oqarpoq. 

Avannaanit qisuariaat
Mittarfiliornissanut siunnersuutip pitsaasumik qisuariaatigineqarnissaa Avannaata Kommunianit Palle Jeremiassenimit neriuutigineqarpoq.

- Kalaallit Nunaata aningaasaqarneranut ilorraap tungaanut sunniuteqarsinnaaneranik, tamatsinnit piumasarineqartumit tamanna isigineqassaaq. Siunissami annertuunik unammillerfissaqarpugut. Utoqqaat amerliartussapput, pisortanilu immikkoortumut aningaasartuutit innuttaasunut annertunerusumik kiffartuussisoqalernera malillugu annertusiartussapput. Inuusuttut nunatsinnik qimatsisinnagit tamaaniiginnartinnissaat aamma pisariaqarpoq. Tamaani aalisarnermik periarfissat isertitallu naammanngillat. Taamaattumik suliarisassat nutaat pisariaqarpoq, taamaalilluni takornariartitsinermit isertitat annertusarneqarsinnaammata, borgmesteri allappoq.

Nipi alla
Kangerlussuup mittarfittut atorunnaarnissaa takornariaqarnermut innarliisinnaasoq Qeqqata Kommunianit ernumassutigineqarpoq. Qeqqata Kommuniani Kommunalbestyrelsip ataatsimiinnermini, kommunimi attaveqaqatigiinnermi atortulersuutit annertunerusut katsersuutsilernissaat siunertaralugu, ingerlatseqatigiiffimmik pilersitsivoq. Kommunip Kangerlussuarmi mittarfik 1 koruunilerlugu pisiarerusuppaa.