Skip to main content

Naalakkersuisut qulingiluat Kielsen-ip ilisaritippai

Naalakkersuisut suliassaqarfii Naalakkersuisunut qulinut manna tikillugu agguarneqarsimasut qulingiluanut agguarneqassapput, taamaattorli Kielsen ilimasaarivoq pisariaqassappat qulissaat sillimasuutigineqartoq.

Naalakkersuisoqarfiit tallimat Siumumit inuttalerneqassapput, marluk Partii Naleqqamit, ataaseq Atassummit aammalu ataaseq Nunatta qitornaanit. Tassa Naalakkersuisut qulingiluaassapput Naalakkersuisut Siulittaasuat Kim Kielsen (S) siuttoralugu.

Suliassaqarfiit Danmarkimit suli tiguneqanngitsut aammalu Naalakkersuisooqatigiit ukiuni tulliuttuni sisamani anguniarlugit siunniussaat assigiinngitsut 350-it innersuussutigalugit, Kim Kielsen aperaarput Naalakkersuisoqarfiit aaqqissuussaanissaat amerlassusaallu qinigaaffimmi suliassanik kivitsinissamut naammannersut:

- Aallaqqaammut takuniarparput katitigaaneq maanna saqqummiussarput aallaavigalugu suliassat siunniussagut naammassilluarsinnaanerlutigit, taakkulu suliassat 350-it anguniarnissaannut tunngatillugu. Paasinarsissappat Naalakkersuisuni ilaasortat amerlinissaat pisariaqartoq, taava taanna sillimaffigereerpara, tassa naalakkersuisoqarfiit qulissaannik pilersitsisinnaaneq, Kim Kielsen (S) akivoq, taassumalu oqaatigaa Naalakkersuisut siulittaasuattut qaqugukkulluunniit nalimmassaanissani pisinnaatitaaffigalugu.

Tunngaviusumik inatsiseqalernissamut isumalioqatigiissitaq nutaamik siulittaasortaassaaq 
Kim Kielsen-ip erseqqissaatigaa tunngaviusumik inatsisissamik piareersaataasumik sulissutiginninneq nanginneqassasoq, Vittus Qujaukitsoq (NQ) suliassaqarfimmi naalakkersuisutut akisussaasutut siuttoralugu, maanna Vivian Motzfeldt (S), manna tikillugu siulittaasuusimasoq, Naalakkersuisuni ilaasortanngortussanngormat nutaamik siulittaasoqalersineqassalluni: 

– Isumalioqatigiissitap siulittaasussaanik toqqaasussaassaagut, aammalu isumaqatigiinniarnerit kingunerisaannik partiit naapiffigisinnaasaannik allannguissaagut. Taamaalillutik partiit namminneq ilaasortaatitassaminnik toqqaasinnaalissapput, toqqagaallu Inatsisartuni ilaasortaasariaqanngillat. Qanorluunniit issagaluarpat suliaq pinasuartumik nanginneqassaaq, taamaattorli peqqissaarluni aammalu innuttaasut peqataatilluarlugit, Kim Kielsen (S) nassuiaavoq.

Inatsisartut suleriaasiat allanngortinneqassamaartoq
Amerlasuunit ilisimaneqalereersutut Partii Naleqqap siulittaasua, Hans Enoksen Inatsisartut siulittaasuattut innersuussutigineqassamaarpoq. Enoksen Partii Naleqqamik pilersitsigamili siuttuuvoq ersarissoq, oqallinnerni amerlanerpaani partiip oqaaseqartartuini salliusarluni. Siunissami aggersumi Inatsisartut tamaasa siuttuuffigisussaavai, periarfissarlu taanna atussamaarnerarpaa allanngortiterinissamut:

– Suliassara eqqissillunga tigussavara, aamma kinguaariit nikinnissaannik sulissuteqarluta aallartittussaavugut, soorlu Atassut massakkut taamaaliortoq. Naalakkersuinermik suliaqarlunga partiimi siulittaasutut naassaanngitsumik ingerlanavianngilanga, aamma qujanartumik ilaasortaatitaqalerpugut pitsaasunik partiip soqutigisai aallaavigalugit Inatsisartuni sulilluarsinnaasunik. Inissisimaffittaara atussavara Inatsisartut suleriaasiannik allanngortiterinermut, assersuutigiinnarlugu Inatsisartuni ilaasortat siunnersuuteqaraangamik allaffissornikkut sullinneqarnerat pitsanngorsaavigineqartariaqarpoq, piumasaqaatillu naapertuutinngitsut iluarsineqartariaqarput. Aammattaaq illuatungiliuttunngortut pitsaasumik siunnerfilimmillu suleqatigilluassavagut, Hans Enoksen isumalluarluni oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

MEST LÆSTE

SENESTE NYHEDER