Tallimanngorpat nalunaaqutaq 11.00, kikkut Naalakkersuisuni ilaasortanngussanersut paasissavarput. Siumup allattoqarfia Sermitsiaq.AG-mut taama ilisimatitsivoq.

Taamaalillunilu naalakkersiusoqatigiinnissamut isumaqatigiissutip atsiorneqarneranit sapaatip-akunnera qaangiuttoq tamanna pissaaq.

Naalakkersuisut allattorsimaffiata saqqummiutinnginnerani, Qinigaanerup misilinneqarnissaanut ataatsimiititaliap innersuussinera Siumup siulittaasuata Kim Kielsenip utaqqeqqaarniarlugu oqaatiginikuuaa.

Paasissutissat pissarsiarisagut naapertorlugit ataatsimiititaliaq ualimut ataatsimiissaaq.

Hans Enoksenip Inatsisartunut siulittaasunngornissaa paasinarsereerpoq, Kim Kielsen soorunami aamma Naalakkersuisunut siulittaasunngussaaq.

Sermitsiaq.AG-p paasisai naapertorlugit Partii Naleraq marlunnik naalakkersuisuutitaqalissaaq, aappaa partiimi politikkikkut siuariapiloortortaanut, Pele Brobergimut tunniunneqassaaq.

Atassummi partiip siulittaasua Siverth K. Heilmann naalakkersuisunngussasoq naatsorsuutigineqarpoq. Partiilu ataatsimik saniatigut naalakkersuisuutitaqarnissamut neriuuteqarsinnaanersoq nalunarpoq.

Nunatta Qitornaanni Vittus Qujaukitsoq ilaasortanngussanngippat tupaallannartuussaaq.

Naalakkersuisuuffiit sinneri Siumumit pissarsiarineqassapput, tassanilu Kim Kielsenip inuit Inatsisartunut qinigaasimanngitsut ilaasortanngortinnissaanut periarfissaqarpoq.

Maanna naalakkersuisuuffiit agguataarneqarneri qimerloorniarlugit siumut kalerriutiginikuuaa.