Pingasunngormat Nuummi GUX-imi qinersisartunik ataatsimiisitsisoqarpoq.

Tassunga atatillugu Sermitsiaq.AG-ip ilinniartut tallimat qineqqusaarnerup maannamut qanoq ingerlanneqarnera qanoq isumaqarfigineraat inuusuttullu isumaat politikkerinit tusaaniarneqartarnerat pillugu apeqquteqarfigisimavai.

Mads C. Høegh, 18-inik ukiulik, 2.N: – Kalaallit Nunaat namminiilivinnissamut piareersimanngilaq. Suli piareersimanngilluinnarpugut. Tamannalu sammineqarpallaaleraangat politikkerinut tusarnaarusukkunnaartarpunga. Taamaammat neriuutingaara nutaamik isinginnittariaaseqarlertoqartariaqartoq. Isumaqarpunga politikkikkut eqqarsartariaaseq pisoqalisimasoq, taamaammat politikkerit nutaartaqartaleriaqarput.

Runo F. Noahsen, 20-nik  ukiulik, 3.Q: – Namminiilivinnissamut oqallinneq soqutigisorsuunngilara. Isumaqarpunga oqallinneq isumaqaranilu piviusorsiornerunngitsoq. Isumaqarpunga namminiilivinnissamut piareersaasiorluartoqareernerata  kingorna aatsaat oqallineq  aallartinneqassasoq. Ajornartorsiutit sammineqanngippallaaqaat, assersuutigalugu ilinniartitaaneq. Qujanartumilli tamaani inuusuttunit peqataaffigineqarluartumik qineqqusaartitsisoqarpoq, taamaammat neriuutigaara inuusuttut isumaat tusaaniarneqarluarumaartut.

Najannguaq Qvist, 19-inik ukiulik, 3.R: – Isumaqarpunga partiit assigiinngitsut pingaartitaat pillugit paasissutissat pissarsiariuminaappallaartut, taamaakkaluartoq isumaqarpunga partiit amerlasuut asuli neriorsuisaqattaartut. Taamaammat kina qinissanerlugu nalunarpoq. Partiit suut pingaartitarineraat pillugu paasissutissat amerlanerusariaqarput. Inuusuttut politikkerit isumaat pillugit oqaaseqartarsimanersut ilisimavallaanngilara. Kisianni soorunami neriuutigaara tusaaniarneqarumaartugut, Kalaallit Nunaatami siunissaata ilagaatigut.

Kristine Josefsen, 18-inik ukiulik, 3.S: – Aatsaat qineqqusaartunut malinnaavunga. Isumaqarpunga quleqquttat arlallit partiit isumaqatigiissutigingaat. Politikkeriniilli paaserusuppara Nuummi mittarfiup allilerneqannginnerani pinngortitaq eqqarsaatigissaneraat. Oqallinnerit malinnaavigalugit soqutiginartarput, illuatungaanili pilersaarutit qanoq aningaasalersorneqarnissaat eqqarsaatigisarpara. Inuusuttut kollegianik amerlanernik perusunnerat politikkerinit tusaaniarneqarumaartoq ilimagaara.

Thomas H. Schmidt, 27-nik ukiulik, 3.S: – Malinnaavallaanngilanga, kisianni isumaqarpunga siornatigorniit isumaqatigiinnerummata oqallinnerit torernerusumik ingerlanneqartut. Ukiut siuliini pisuuteqattaattuarsimapput, taamaammat massakkut eqqissisimanerunat nuannerpoq. Ataqqeqatigiinnertimmi takutippaat, tamannalu tusarnaarusulersitsisarpoq. Taassuma saniatigut oqaatigerusuppara, inuusuttut amerlasuunik neriorsorneqartartut piviusunngortinneqarneq ajortunik.