Niels Thomsen (D) nalorninngilluinnarluni innersuussivoq Nuummi mittarfiup tallineqarnissaa mittarfiup piginnaasaanik annertusaaniarnerusoq illuatungaanili Ilulissani Qaqortumilu toqqaannartumik naleqarnerulersitsinissamik siunertaqarluni pilersaarutaasut. 

Taamaammat Demokraatit siulittaasuata paasisinnaannginnerarpaa mittarfissualiornissanut pilersaarut pillugu IA sooq allannguiniarsarilernersoq:

- Mittarfissualiornissanut pilersaarummut ukiualussuit IA pissutsinik equngasorisaminik iluarsiniaanissaminut periarfissaqarnikuuvoq. Allaammi IA toqqaannartumik nammineq partiitut sunniuteqarnerpaasinnaanikuuvoq, piffissap taassuma ingerlanerani naalakkersuisooqataanikuugami. Maannali isiginnittuuffigaarput IA-p piffissaq kingullerpaaq atorlugu suliniummik allannguiniarsarilernera, uffa massa suut tamarmik inissikkaluttuartut. IA-kkut saqqummiussinerat nutaajulluinnarpoq, taamaammallu partiitsinni Demokraatini sukumiisumik eqqartussallugu periarfissaqarnikuunngilavut, taamaattorli maannangaaq oqaatigisinnaavara suliniut aallaqqaataanut inisseriarlugu aallaqqaataaniit aallarteqqinnissamut arlaannaatigulluunniit peqataassalluta pilersaaruteqannginnatta. Taamaammallu erseqqissassavara Demokraatit tungaanniit 2015-mi aalajangersaanerit aallartimmatali sammivipput allanngornikuunngimmat, taamaammat pilersaarutit pioreersut naammassineqarnissaannut akisussaaqataanerput, naalakkersuisooqataagutta naalakkersuisooqataanngikkuttaluunniit ingerlatiinnassavarput, Demokraatit siulittaasuat, Niels Thomsen nalornissuteqarani oqarpoq.

Atuaruk: Nuuk siulliunneqarli - Ilulissani mittarfik naanneruli

Niels Thomsen-ip innersuussutigaa Kalaallit Airports A/S-ip suliniutinik suliaqarnermini annertuumik piareersimalereersimanera:

- Ingerlatseqatigiiffik ersarissumik suliakkerneqarnikuuvoq, taamaalillunilu aamma mittarfissualiornissanut pilersaarutip naammassiniarneqarnissaanut qanoq suleriaaseqarnissaa ersarissuuvoq, maannalu amigaatigineqaannalersoq tassaavoq sinaakkutassatut inatsisissaq, tassa mittarfissuit sanaartorneqarnissaannut inatsisissaq (imm. 21, inatsisartut ukiakkut ataatsimiinnerminni aappassaaneerlugulu pingajussaaniigassaat, aaqq.),  Naalakkersuisut siulittaasuat aammalu statsministeri isumaqatigiissusiornikuupput mittarfissualiornernut tunngatillugu naalagaaffiup akuutinneqarnissaa pillugu, uagullu Inatsisartunit isumaqatigiissut, allannguuteqarpat allannguuteqanngippalluunniit, akuerissagutsigu, aningaasaliissutissat sinnerinut tunngatillugu suliassat KAIR-imut ajornaatsunngussapput, tamannami isumaqassammat Kalaallit Nunatta avataanut taarsigassarsiniartariaqarnera affaannanngortinneqarsimassasoq, taamak piareersimatigaluta anguniakkatsinnullu qanillereertigaluta suut tamaasa sapangiinnassavagut, Demokraatit siulittaasuat Niels Thomsen aperivoq.

Atuaruk: Olsvig: Mittarfiit pillugit saqqummiussinerput ima tunngaveqarpoq

Isumaqatigiinniutiginianngilaat
Tassa oqaatsit ersarinnerulersissagaanni, mittarfissualiornissamut pilersaarutit pillugit Demokraatit nutaamik isumaqatigiinniarnianngillat. Aperigatsinni Naalakkersusisut siulittaasuata nutaanik naalakkersuisuliorniarnerminik iluatsitsissanngippat taava IA-p taamak alloriarnera naalakkersuisooqatigiilersinnaanissamut periarfissanik annikillisitsinersoq, Thomsen naaperiaarusussuseqarnerusumik akivoq:

- IA-p paasisariaqarpaa matumani pineqartoq pillugu, tassa mittarfissuit pillugit allatut isumataarnavianngilagut, soorunami killiffimmi aaqqitassat assigiinngitsut suli naammassineqanngikkaluartut, allatut isumataarnavianngitsugut. Tassa Mittarfissuarnut pilersaarut attapparput, taamaammat IA-p allaanerusumik pilersaaruteqalernini poortoriarlugu ingerlaqqissappat, oqaloqatigiinnerit tassanngaaniit tigussavavut, Niels Thomsen (D) oqarpoq.

Niels Thomsen matumani kaammattuivoq mittarfissualiornissanut pilersaarut pillugu eqqissisimanerusumik sulisoqartariaqalersoq:

- IA-p mumilluinnarnera Siumullu ilumini eqqissiviilliornera inuiaqatigiinnut kalaallinut arlaannaatigulluunniit iluaqutaanngillat, neriuppunga partiit taakku marluk iliuutsimikkut nunarput, aammalu inuiaqatigiittut ataqatigiinniarnerput, taamak sanngiiffeqareertigisoq, qanoq innarlertiginerlugu nassuersinnaassuseqassasut aammali nunatta avataaniit tutsuiginassusianik qanoq innarliitiginerlutik takugasuassagaat eqqissiimillutillu, Niels Thomsen (D) tikkuaavoq.

Atuaruk: Simonsen: IA'p saqqummiussaa siunertatsinnut assinguvoq

Isumaqatigiinniarnerit sukkanerusariaqarput
Partii Demokraatit IA-tulli tallimanngornermi 21. september Siumumit aggersarneqarnikuupput. Niels Thomsen-illi kissaatigigaluarpaa pisut sukkanerusumik ingerlanneqassasut:

- Innuttaasut pisinnaatitaaffigaat nunatta naalakkersuinikkut qanoq ingerlanneqarnissaa pillugu ilisimatinneqassallutik, tamannalu sukkanerusumik naammassiniarneqartariaqarsorivara, taamaammat matumani aamma Siumut kajumissaassavara suliap pilertornerusumik ingerlanneqarnissaa isumannaarneqaqqullugu, uagut isumaqatigiinniarnissamut piareersimavugut, Niels Thomsen naggataatigut oqarpoq.