Nukappiaqqat arsaattartut tamarmik sungiusaasuallu qaarusussuarmit ajunngitsut anninneqarput, Thailandimi sakkutuut imarsiortut aqqartartui ilisimatitsipput.

- Nukappiaqqat aqqaneq-marluk tamarmik sungiusaasuallu qaarusussuarmit ullut 18-t ingerlareersut annaanneqarput, Thailandimi sakkutuut imarsiortut Facebookimi allapput.

- Tamarmik isumannaatsumiipput.

Facebookimi nalunaarut ‘’Hooyah’’-mik ataatsimik atsiorneqarpoq.

Aqqartartut sisamat qaarusussuarmeeqataasut, suli anillanngillat. 

Upalungaarsimanermik suliallit 19-it annaassiniarnermut peqataapput, taanna Nunatta nalunaaqutaa malillugu 01.08 aallartinneqarpoq.

Nukappiaqqat arfineq-pingasut sapaammi aamma ataasinngornermi annaanneqartut, ‘’qiimalluinnartut’’, aamma arsartarnertik pissutigalugu timaat akiuussutissaqarluartut, peqqinnissaq pillugu oqartussani oqartussaasoq oqarpoq.

Meeqqat soiulliit annaanneqartut – 12-nit 16-inut ukiullit – maanna nalinginnaasumik nerisinnaanngortut, Jesada Chokdumrongsuk, peqqinnissamut ministeriaqarfimmi pisortap tullia oqarpoq.

Marluk puamikkut aseruuttoorunarput, kisianni tamarmik ataatsimut isigalugit ‘’peqqipput’’ aamma ‘’qungujulapput’’.

Eqimattat tullii nukappiaqqat sisamaasut, ataasinngornermi annaanneqartut 12-14-nik ukioqarput.