Nuuk International Film Festivaleqqaqqilerpoq
Filmsestivali anguniagaqarluartoq septembarimi ingerlanneqassaaq, nunani tamalaaneersut tikeraassapput, filminik takutitserngaartoqassaaq aamma oqallittoqassaaq
2017 tassaavoq Kalaallit Nunaat siullerpaamik filmfestivalimik pilersitsiffik. Nuuk International Film Festival, imaluunniit NIFF, Nuuk Nordisk kulturfestival aaqqissuuneqarneranut atatillugu oktobarimi ingerlanneqarpoq, filmfestivalimut tikeraartunit alutoralugulu nuannarineqaqisup, ukiormanna namminerisaminik ingerlatsissaaq.
Filmfestivaali septembarip 19-nit 22-annut aappassaa ingerlanneqassaaq, aaqqisssuisup nunatsinni filmiliornermik ingerlatsisut film.gl-ip suleqatigissavai Katuaq, Grønlandsbanken, Ilimmafik aamma Namminersorlutik Oqartussanit taperneqarpoq.
Filmiliortartut malunnartillugit
- Isumaqarpugut pisariaqartoq filmiliornermik suliaqarneq nalliuttorsiutigisariaqarlugu, siorna ingerlanneqartup ersersippaa kalaallit filmiliortartut taakulu filmiliaat malunnartinniartariaqarlugit, taamaaqataanillu nunani tamalaaneersut filimiliornermik suliallit attaveqaqatigiinnermik suleqatigiinnermillu aamma siammasissumik pilersinneqarmata, peqatigiiffiup siulittaasua Pipaluk K. Jørgensen oqarpoq.
- Kalaallit Nunaanni filmiliornerup silarsuaa ineriartupiloortup festivali pingaaruteqarneranik soqutigineqarneranillu ersersitsivoq, periarfissanillu nutaanik pilersitsiviulluni. Nuannaarutigaarpullu NIFF nammineerluni ingerlanneqarsinnaalermat illoqarfimmi aaqqissuussinerit allat apeqqutaatinnagit.
Kalaallit filmiliaat nutaat
Festivaalertoqarnerani septembarip aallaqqaataani erserseqqaartoqarnerani kalaallit filmiliaannik nutaanik takutitserngaartoqassaaq, nunat tamalaaneersut ilitsersuisartut filmiliortartullu allat oqallitsinneqasssapput, minnerunngitsumillu issittormioqatigut Sápmi, Yakutsk, Nunavut aamma Nunavik aallartitaqassallutik.
Filmit takutitassat ilaat, Canadameersoq akissarsisinneqarsimasoq naatsuliaq "Three Thousand" Asinnajaq-mit sananeqarsimasoq, inuusuttunnguaq pikkorissoq Canadamioq filmiliortartoq aamma Nuummiissaaq.
Festivaali kulturikkut illorsuarmi Katuami amerlanerit ingerlanneqartussaapput, aaqqissuussallu takutitsinerillu ataasiakkaat aningaaserivimmi GrønlandsBankenimi aamma Ilimmarfimmi ingerlanneqassapput.