Nuuk: Namminersorlutik Oqartussat inissiaateqarfiisa eqqaanni eqqaavilersuisoqarpoq
Illuut A/S aamma INI A/S aaliangerput, Nuummi sumiiffinni assigiinngitsuni avatangiisinik mianerinninnissaq pillugu eqqaaveqarfinnik sanatitsiniarlutik.
Taaneqartut Nuummi, Nuussuarmi Qinngutsinnilu Namminersorlutik Oqartussat inissiaatigisaasa qanittuani sanatinneqassapput. Taakkulu atorneqassapput eqqagassanut assigiinngitsunut aamma eqqakkanut igalaaminernut, saviminernut batteriinullu immikkoortiteraluni eqqaavissatut. Illorsuit tulleriiaarlutik eqqaaveqarfiit atulissavaat, eqqakkanik nakkaatitsiviit, containerit eqqaavittut atorneqartut matoriarpata.
Sanaartortitat sumiiffiit ilaanni suli ingerlapput, sumiiffillu ilaanni naammassereerlutik. Qapiarfiusaaq siulliulluni eqqaaveqarfiit atulissavaat juuliminngaanniik. Kingulliillu ukiap ingerlanerani nammassineqassasut naatsorsuutigineqarpoq, apeqqutaalluni silap allallu aporfiusinnaasut qanoq inneri.
Sanatitat pineqartut pilersinniarneqarput ilaatigut inissiaatini nakkartitsilluni eqqaaviit tippatsitsisarnerat qaangerumallugu aamma INI-p Illuutillu tungaaniit eqqagassalerinermi avatangiisinik mianerinninnissamik kissaatigineqartut malinnerulerumallugit.
Inissiaatileqatigiifiit taakku marluusut inissiaataanni najugaqartut sukumiinerusumik ilisimatitsissuteqarfigineqarumaarput, eqqaaveqarfiit sanaartortinneqartut atorneqartussanngorpata aamma paasissutissinneqarumaarlutik eqqagassanik immikkoortiterinerit qanoq ingerlanneqartartussaassasut. Siullermillu eqqagassat, eqqagassallu angisuunut eqqaaveqarfiit atussapput, kingornalu igalaanillu puullit, savimminikut mikisut, batteerillu immikkoortinneqarsinnaalissallutik.
INI-mit Sisimiuni taaneqartutut aaqqissuussinerit pitsaasumik misilittagaqarfiupput. Taamatullu aaqqiinerit Sisimiuni 2012-imili aallartinneqarsimapput.
