Oqaaseqartartoq: Pissaaneq apeqqutaalluni inissititserisoqassaaq
Naalakkersuisoqatigiinnissamut isumaqatigiissut saqqummiunneqarneranut atatillugu Naalakkersuisut ilisaritinneqarsimannginnerat, Kuup Kleistip eqqumiiginartoqartippaa
Sermitsiaq.AG-ip politikkikkut oqaaseqartartoq Kuupik Kleist 2009-imi Naalakkersuisoqatigiinnik toqqaasussaasimasoq oqaloqatigaa.
Ulluni makkunani Siumup siulittaasua Kim Kielsen taamaaliortussaavoq.
- Naalakkersuisut toqqarneqarniarnerini suut pingaartinneqartarpat?
- Qinersisoqarnerani partiit qinersisaat aallaavigalugit pissaaneq agguataarneqassaaq, tassanilu pingaaruteqarpoq partiit allat soqutigisaannik tusarnaarnissaq. Naalakkersuisoqatigiilersummi qinigaaffimmi ataannarsinnaanissartik sulissutigisussaavaat. Taamaammat oqartussaaffinni assigiinngitsuni agguataarinnilluartoqarnissaa sulissutigineqarunarpoq, Kuupik Kleist akivoq.
Naalakkersuisunngortussat Inatsisartunut qinigaasinnaanersut misissorneqaqqaartinnagu Kim Kielsen atinik saqqummiussaqarusunngilaq.
Qinigaanerup Misilinneqarnisaanut Ataatsimiititaliaangallartup, pinerluuteqarsimasunut nalunaarsuiffik ikiortigalugu, qinikkat pineqaatissinneqarsimanersut qinigaanermut inatsimmi allassimasutut ‘pissutsit Inatsisartunut Naalakkersuisunullu ilaasortat ilaasortaanerannik naleqqukkunnaarutaasut’, misissorneqartarpoq.
- Naalakkersuisut inuttalersorniartillugit utaqqititsisoqarnera aatsaat takuara, ileqquungaluarpormi naalakkersuisoqatigiinnissamik isumaqatigiissut atsiorneqarnerani Naalakkersuisut nutaat ilisaritinneqartarnerat. Imaassinnaavorli isumaqatigiissut inisseqqaarlugu aatsaat Naalakkersuisut inissititserneqartut, Kuupik Kleist oqarpoq.
