Qanoq ililluni allaanerusinnaagunaraluarneranik, Nauja Lynge oqallissaarummik atuakkiorsimavoq. Kisianni ‘Jeg er Nauja - En grønlandsdanskers bekendelser’ oqallissaarutaannaanngilaq. Atuagaq oqallissaarutaavoq atuakkiortup nammineq inuunerminik oqaluttuarneranik tunngaveqartoq.

- Danmarkimi kalaaliunerup qanoq ittuunerata misissornerani imminut assersuutitut atorpunga, taanna Sermitsiaq.AG-mut oqarpoq.

Kinaassutsini miserratigigaa
Nauja Lynge danskit raatiuni aallakaatitassiani tunngavilersuilluarluni saqqumilaartartutut, oqallissaarisutut nukittuutut ilisarisimaneqarnerugunarpoq. Kalaallit ingerlalluartut pillugit oqaluttuartoqaleraangat maligassiuisutut saqqummiunneqartarpoq.

- Atuakkami imminut saqqummiuppunga. Inuunerup annersaata ilaani kalaaliulluni kinaassutsip miserratiginninnerup qanoq annernartiginera oqaluttuaraara.  

Miserratiginninneq danskit ilisimasaqannginnerannik aallaaveqarluinnarpoq. Danskit amerlasuut kalaallinik isiginnittariaasaannik aallaaveqartoq. 

- Ukiuni 40-ni allanit pitsaanertut imminut inissittarpunga. Kalaallinut allanut ungasinniartarlunga. Danskit kalaallit pillugit quujassuaatiginnikkaangata illaqataasarpunga – naak tamatigut annernartaraluartoq. 

- Piffissami taama sivisutigisumi taamaattuusaarsimagaanni, tamanna ileqqunnguutiinnartarpoq, taanna oqarpoq. 

Isasoorneq
Kisianni kinaassutsimik miserratiginninneq akeqarpoq, tamatumalu akia aalajangiisooratarsinnaavoq. Namminersorlutik Oqartussat eqqartuussissutiginninnerannut ajugaanermi kingorna tamanna Nauja Lyngemut malunniuteqarpoq. 

- Isasuiippunga, piffissap ilaani imminut toqunniarlunga isumaliutigigaluarpara.

Taanna ullumikkut sapaatip-akunneranut ataasiarluni tarnip nakorsaanukartarpoq. Taassumalu kalaallit allat Danmarkimi najugaqartut qaamikkut nukittuutut inissisimasut, iluminni kinaassutsiminnik unammilligaqartut qularutiginngilaa.

- Isummatsinnit pitsaanerunngitsumik ingerlavugut.

Ikinnerussutilittut akuerineqarnissaq
Nammineq misilittakkani aallaavigalugit aaqqiissutissanik ujartuivoq. Danskit tungaannit kikkut tamarmik danskisut innuttaassuseqartut danskisut tamarmik ileqqoqannginnerat ataqqineqartariaqartoq, taassuma tikkuarpaa. Naalagaaffeqatigiit danskiupput, kalaalliupput aamma savalimmiormiuupput – tassanilu tamarmik immikkut kinaassuseqarnerat pineqarpoq.

- Kalaallit Danmarkimiittut nunami ikinnerussutilittut akuerineqarnissaannut aqqutissiuisoqartariaqartoq isumaqarpunga.

- Kinaassuserput nassarsinnaatitaalerutsigu, taava kamannerup annertuup maanna avissaartuutaasoq peerneqassagaluarpoq.

Sianiinneq
Soorunami Naalagaaffeqatigiinnerup attanneqarnissaanut ilungersuuteqarneq atuakkami toqqorneqarsimanngilaq. Danskit isummiussereertarnerat Naalagaaffeqatigiinnermut ulorianartorsiutaanerpaatut taassuma maanna isigai. Bertel Haarder atuakkamut siulequtsiummini taama aamma inerniliussaqarpoq.

- Apeqqutinik sianilluanngitsunik kalaallinut savalimmiormiunullu danskit sianilluanngissusaannik eqqorneqarpoq. Naalagaaffeqatigiinnerup partiit namminiilivinnissamik anguniagaqartut akeraasa annersarinngilaat, danskit ilisimasaqannginnerat, soqutiginninnginnerat, toqqaannaq oqaatigalugu: sianiissusaat ajoqutaanerpaavoq, taanna allappoq.

Atuagaq ‘Jeg er Nauja’ naqiterititsisarfik Filo aqqutigalugu qaammatip naanerani saqqummissaaq.