- Kalaallit semifinalimut anngussinnaagunik anguniagaq anguneqassaaq.

GHF-imi siulittaasoq Jørgen Isak Olsen Pan Am-ertoqarnissaanut atatillugu Sermitsiaq.AG-mut oqarpoq.

- Tamanna anguneqanngippat pitsanngoriaateqartoqarnissaanik ersiuteqartoqassaaq. Nr. 11-tut 12-tullu inissinneq naammaginanngilluinnassaaq. Kisianni VM-imut anngunnissaat neriuutigeqaarput, oqarpoq.

Sungiusaasoq misilitsinngilaq
Ingi Olsen nunanut allanut unammisartunut sungiusaasunngorpoq ukioq kingulleq novemberimi.

- Pan Am misilitsissutigissanngilaa. Atorfinitsinneqareernerminit unammersuaarneq siulliussaaq Pan Am-ernissaq, taamaattumik pissusissamisuussanngilaq eqqartussallugu Pan Am-ertoqareerpat atorfimmiiginnassasoq imaluunniit allamik taarserneqassanersoq, Jørgen Isak Olsen erseqqissaavoq.

Siuariartoqarnissaanik naatsorsuutit
Siumut isigisumik ineriartortoqarnissaa kattuffimmit naatsorsuutigineqarpoq.

- Inuusuttup Marco Geislerip peqataasussatut toqqarneqarnera siunissamut isigisoqarnera naqissuserneqarpoq. Siunissamut qanittumut isigisoqassanngilaq, kisianni siunissamut ungasinnerusumut ineriartornissaq takorloorneqassaaq. Ingi Olsen sueqatigisareerparput, sungiusaasutsialaavoq unammisartuminullu piumasaqaateqartarluni.

- Siuariaateqartoqarsimanissaanik soorunami Pan Am-imi takutitsisoqarnissaa naatsorsuutigaarput, tassami piareersarninnut aningaasarpassuit atorneqarput, taamaattumik soorunami naatsorsuuteqarpugut siuariartoqarsimanissaa. Toqqarneqartulli saamittaqanngillat, unammisartuusimasutut sungiusaasuuismasutullu oqaatigisinnaavara tamanna unammillernarsinnaasoq, Jørgen Isak Olsen oqarpoq.