Sooq timersorneq politikkikkut isummanik anguniakkanillu saqqummersitsiviusariaqarnersoq, Miki Brandtip Sisimiuneersup paasisinnaanngilaa.

- Timersornerup anersaavanik timersorneq ammip qalipaataa, upperisaq imaluunniit politikkikkut isummat apeqqutaatinnagit ataatsimoorfiutinneqarli, kattuffimmut ilaatigut allappoq, ussassaarutit peerneqarnissaat periuutigalugu.

Peerneqassapput
Ussassaarutit peerneqassasut Sermersuumi kommunaldirektørip Lars Møller-Sørensenip Sermitsiaq.AG-mut ilisimatitsissutigaa.

- Ussassaarutit isorineqarnera paasigatsigu akunnerup naanerani aalajangerpugut ussassaarutit peerneqassasut. Kingulliit ullumi peerneqassapput.

- Mittarfinnut tunngatillugu suliaq pingaaruteqartorujussuartut isigaarput, pilersinneqarnissaannut atatillugu tapersersuinerput takutipparput. #2200meteri assigiinngitsuni saqqumitinneqarpoq, Pan Am-imilu aamma takuneqarsinnaalluni, Lars Møller-Sørensen oqarpoq.

Ussassaarutit unammisoqarnera pissutaalluni sapaatiummat peerneqarsinnaasimanngitsut aamma ilisimatitsissutigineqarpoq.

Aqutsisut akisussaaffigaat

Timersoqatigiiffiit Assammik Arsartartut Kattuffiata siulittaasua Jørgen Isak Olsen aamma pisoq pillugu Sermitsiaq.AG-mit aperineqarpoq.

- Siullermik erseqqissaatigissavara PANAM 2018 kattuffiup avataani immikkut aqutsisoqarluni ingerlataammat taamaammallu assammik arsartartut kattuffianit toqqaannartumik ulluinnarni aqunneqarani.

- Aqutsisoqatigiinni assammik arsartartut kattuffiat issiasuutitaqarpoq. Tassani suut natermut allatullu ussassaaruteqarnermi eqqartuisoqarsimanngilaq killiliisoqassaneranik. Aamma matumani pineqartoq natermut nipititaq Sermersuup kommuniata akilerlugu ikkutsitaa, Jørgen Isak Olsen oqarpoq.

Kommuneqarfik Sermersuup aamma kommunip allaffiani ussassaarummik nivinngaanikuuvoq, tassani Nuummi 2.200 meterimik takissusilimmik mittarfiliortoqarnissaannik Inatsisartut aalajangiinissaannik qulakkeerinninnissaq siunertarineqaluni.