PANAM-imi aaqqissuisut bussit isumaqatigiissuteqarfigaat
PANAM-imik aaqqissuisut Nuup Bussii isumaqatigiissuteqarfigaat
- Timersortartut –Nuummut tikinnerini Nuummiillu aallalernerini– akunnittarfimmiit Inussivimmut unammiartorlutik angallanneqarnissaannik isumaqatigiissuteqarneq assut nuannaarutigaarput. Taamaammat Nuup Bussii PANAM-ip iluatsinnissaanut suleqataarusussuseqarnera nuannerpoq, assammik arsaalluni unammersuarnissamut ataqatigiissaarisoq, Poul Petersen tusagassiuutinut nalunaarummi oqarpoq.
Nuup Bussiini siulersuisuni siulittaasoq Maliina Abelsen isumaqatigiissummik atsioqatigineqarpoq.
Amerikap nuvittaani assammik arsaalluni pissartanngorniutivinneq Nuummi 16. juni – 24. juni ingerlanneqassaaq. Pissartanngorniutivinnermi iligiit inissilluarnerit pingasut nunarsuarmi pissartanngorniunnissamut anngutissapput.