Nunatsinni pinerluttarnerit 9 procentimik 2016-mit sanilliullugu amerleriarsimapput. Tamanna Kalaallit Nunaata Politiivisa 2017-mut nalunaarusiaani takuneqarsinnaavoq. Politiinut nalunaarutigineqartartut 1980-kkutulli amerlatigingajattut nalunaarusiami takuneqarsinnaavoq.

Persuttaanerit sisamariaammik amerlisut
- Inoqassuseq naapertorlugu Kalaallit Nunaanni politiinut nalunaaruteqartut sisamariaammik Danmarkimit amerlanerupput, politimesteri Bjørn Tegner Bay nalunaarusiami aallarniivoq.

- Kanngutsaatsuliortoqarsimaneranik nalunaarutiginninnerit ukiunut allanut sanilliullugu allaanerungaanngilaq. Politiinut nalunaarutigineqartut amerlavallaarujussuarput. Meeqqanut kinguaassiutitigut atornerluinerit aamma amerlavallaarujussuarput, politimesterip naqissuserpaa.

Tillinniarnerit kiisalu angerlarsimaffinnut tillinniarnerit ikileriarsimasut nalunaarusiami takuneqarsinnaavoq. Tillinniartoqarsimaneranik politiinut nalunaarutiginninnerit aatsaat taama ikitsigipput.

- Inuusuttut inuusuttuaqqallu pinerluttarnerat aamma ikiliartorput. 2016-mit 2017-mut 24 procentimik ikileriarput, 754-mit 573-mut, Bjørn Tegner Bay nassuiaavoq.

Oqallittoqarnissaanik kaammattuut
- Tillinniarnerit inuusuttullu pinerluttarnerat ikiliartornerat innuttaasunit eqqarsartitsisimassaaq, Bjørn Tegner Bay oqarpoq. Nunatsinni innuttaasut persuttaanerit sakkortuut pillugit oqallittoqarnissaa kaammattuutigaa.