Qaammatip siuliani Kinap siullermeerluni pisortatigoortumik Issittumut periusissaminik nalunaaruteqarpoq. Naak allagaq ataatsimut isigalugu mianersorpalaaraluartoq, aqqutissiaq ataaseq ingammik USA-mi ernumatitsivoq, tassa Polar Silkevejimik pilersitsinissamut pilersaarutit.

Tamanna Wilson Centerimi Washingtonimi aaqqissuussami erserpoq, tassani amerikamiut nunanut allanut naalakkersuisoqarfiani qaffasissumik atorfilittaasimasut oqalugiaramik.

Aamma atuaruk: Issittoq eqqissisimasuunissaa Kinap inassutigaa

- Aasiattut iliortoq
Polare Silkevejiliornikkut Kinap umiarsuit aqqutaat Rusland avaqqullugu Nordøstpassagekkut aamma Nordvestpassagekkoorluni kujammukarnissaa paasivaa. Asiap kujataatigut angalaffissat takisuut qularnartullu aamma Suez-kanalikkoornissat pinngitsoorniarlugit aqqutit Kinamut pilerinartuupput.

Kina aqqummik tamatuminnga pilersitsinissamut siuttunngorniarnera amerikamiut tungaannit qiimmatsaatigineqanngilaq.

- Issittumi naalagaaffiit Kinap 'Polar Silkevej'-imik pilersitsinissamut qaaqqusissutaa imaluunniit taanna oqaaseq atornissaanut tigusinissaat ilimaginngilara, naak Kinap iliuuseqarniarnera naleqquttumik pisoq tikilluaqqussagaluarlugu, Oceanienimi aallartitaasimasoq, David Bolton, taama oqarpoq.

‘Den Polare Silkevej’ pilerisaarinerup annertuup ‘Road and Belt initiative’-mik taaguuteqartup ilagaa, tassani Kina Europamut, kisianni aamma Kangiani Qiterlermut aamma Afrikamut aqqutinut pitsaanerusunut aningaasaliiniarpoq. Tassani niuernikkut aqqutit aamma attaveqatigiinnermut tunngasut pineqarput.

- Kinap Issittumut iliuusissatut periusissiaa nutaaq aasiaap nigaliaminik allisitsineratut isigaara. Ingammik periusissiap Belt and Roadip  pilersinneqarnissaanut tunngatillugu, Sherri Goodman, illersornissamut ministeriaqarfimmi siornatigut atorfilittaasimasoq oqarpoq.

Polar Silkevej nutaajunngilaq
Kinamut aamma Issittumut tunngatillugu Washingtonimi aalassassimaalertoqarnera nunanit tamalaanit ilisimasallit siuttuisa tupigusuutigaat. Tamannami nutaajuallaanngilaq, professor Anne-Marie Brady, Canterbury universitetimi  New Zealandimeersoq oqarpoq.

- Polare Silkevej pillugu isumassarsiaq nutaajunngilaq. Siullermeerluni 2014-imi taaneqarpoq, taanna Sermitsiaq.AG-mut oqarpoq.

Amerikamiut tungaannit Issittup ukkatarineqarpallaarsimannginneranik Washingtonimi qisuariarneq pissuteqarsinnaasoq, Anne-Mary Brady isumaqarpoq. Taanna oqaatsit mandarinisoortut atorsinnaagamigit iluaqutigaa, Kinamiullu iluminni oqallinnerannik malinnaasinnaalluni.

- USA-p Issittumut tunngatillugu Kinami susoqarnera malinnaaffigilluarsimarpasinngilaat, Anne-Mary Brady oqarpoq.

Immikkut soqutiginnittunut:

Kinap Issittoq pillugu periusissiaa uani atuarneqarsinnaavoq.

Wilson centerimi ataatsimiinneq uani tusaaneqarsinnaavoq.

Foesvarsakademiet kinamiut periusissiaannik suliaqarnikuuvoq, uani atuarneqarsinnaavoq.