#suliffiga-tulluusimaarutigaara. Julie Senderovitz Bendtsenip ukiuni qulingiluani maannamut politiiusimanini pillugu Facebookimi allakkani taama aallarnerpaa. Taanna 1.500-t sinnerlugit likerneqarsimavoq, 300-ngajannillu ingerlateqqinneqarluni aamma 250-eriarluni oqaaseqarfigineqarsimalluni.

- Piffissami sivisuumi una allanniarlugu eqqarsaatigaara, taanna Sermitsiaq.AG-mut oqarpoq.

Facebookimi oqalorujunnerit
Ingammik inuit allaaserisanut imaluunniit inuit attaveqaqatigiittarfiini politiit pillugit oqalorujuttarnerat Julie Senderovitz Bendtsenimut oqaaseqartitserusulersimapput.

- Suliaqanngisaannarnitsinnik pasillerfigineqaraangatta annerisarpara. Nalunngilarami suleqatikkalu qanoq ulapittartiginerluta, taanna oqarpoq.

Suliat oqimaatsut 
Julie Senderovitz Bendtsenip allatamini suliat assigiinngitsorpassuit, suliassat ajornakusoortuunerusut, suleqatinilu orniguffigisartakkatik oqaluttuarai.

- Angallannermi ajutoornernut arlalinnut ornigunnikuuvunga, annikinnernut aammali tamakkununnga toqumik kingunilinnut. Ajutoornernut takunnissimasut isumagalugit, akuusimasut isumagalugit, minnerunngitsumillu pisuusut isumagisarlugit, tamarmimmi sunnerteqqasarmata, taanna allappoq.

Toqutsinermi suliani matup illuani takusassartik eqqarsaatiginagu politiit sunnertippallaannginnissaannik pisariaqartitsisarput. Takunnittut oqaloqatigisussaavaat, suliamilu paasinnilluartussaallutik.

- Kingornalu aqqut oqimaatsoq atorlugu qanigisaasut nunarsuarmi oqimaannerpaamik kalerrittussaallugit: qanigisat maaniikkunnaarpoq!, Julie Senderovitz Bendtsen allappoq.

Meeqqat angerlaakkusunnerusaraluarai
Sulialli taassumunnga immikkut sunniisarput. Tassa suliat meerartaqarfiusut. 

- Meerarpassuit isaasigut isiginikuuakka oqaatsit pisariaqarnatik, annilaanganeq, aliasunneq kanngusunnerlu suna tamaat akimorlugu. 
Suna tamaat sapinngisannik anguniartarpara annikinnerpaannguamilluunniit toqqissinermik tunerusullugit, taanna allappoq.

Meeqqat taakku isaat isigigaanni sulisutut inissisimaniarneq soorlu sunniuteqarpallaarneq ajortoq.

- Ilaatigut angerlarsimaffippassuarniinnikuuvunga angajoqqaat aalakoorlutik/ikiaroorlutik assortuuttut paallutillu, eqqissititsisarlunga toqqissisimatitsilerlunga piffiup qimaqqinnginnerani, taanna oqarpoq.

Politiit angerlarsimaffinni eqqissiviilliortunut imaluunniit paasunut meerartalinnut ornigutsinneqaraangamik, inunnik isumaginnittoqarfimmi pigaartoq aggersarneqartarpoq. Kisianni suliassarpassuit suliarinissaannut ikippallaartutut misigisimanartarpoq.

- Ilaatigut tassanngaanniik ingerlagaangama eqqarsartarpunga meeqqat angerlaatiinnarusukkaluarlugit.

Tamakkulu takoqqammisimagaanni, politiit amigartumik sulinerat pillugu Facebookikkut oqaaseqaneq asuli oqalorujunnertut ittarpoq.

- Suliffiga tulluusimaarutigaara nuannaralugulu. Suleqatikka tulluusimaarutigaakka. Inuit qanoq amerlatigisut ikiortarlugu ilisimagakku, Julie Senderovitz Bendtsen oqarpoq.