Politiit naammasserlaat Kalaallit Nunaanni politiinngorniatut ilinniarfimmi tunngaviusumik ilinniartitaanermi, 2016-imi septemberimi aallartinneqartumi, naammassisut siulliupput. Kalaallit Nunaanni politiit tusagassiuutinut nalunaarummi ilisimatitsipput.

Tunngaviusumik ilinniartitaanerup nutaap allaanerussutaa tassaavoq Danmarkimi politiinngorniatut tunngaviusumik ilinniartitaaneq ukiunik marlunnik sivisussusilik assigimmagu.

Fagit immikkut ittut

Kalaallit Nunaanni politiinngorniatut tunngaviusumik ilinniartitaanermi qallunaat nunaanni ilinniartitaanermit allaanerussutaa tassaavoq faginik ilaneqarsimanera, ilaatigut ujaasinerit (SAR – Search and Rescue), aammalu imminut toquttoqarsimatillugu, nakuusertoqarsimatillugu aammalu kinguaassiuutitigut pinerliisoqarsimatillugu sulianik suliarinnittarnernik ilinniartitseqqinnerit, taakkuummata Nunatsinni politiitut ulluinnarni sulinermi naammattoorneqarajuttut, tamanna ilisimatitsissutigineqarpoq.

- Nunatsinni aammalu qallunaat nunaanni politiitut tunngaviusumik ilinniartitaanermut tigutinnissamut piumasaqaatit atugassarititaasullu assigiipput. Nunatsinnut pingaaruteqarpoq inuusuttut Danmarkimi ilinniartitaanermut piumasaqaatit assingi naapertorlugit qinnuteqarsinnaanerat, aammalu Nunatsinni politiitut ilinniartitaanerup qallunaat nunaanni ilinniartitaaneq naligissagaa, specialkonsulent aammalu politiitut tunngaviusumik ilinniartitaanermi ilinniartitsisoq Søren Hardrup, tusagassiuutinut nalunaarut naapertorlugu taama oqarpoq.

Toqqissisimatitsinissamut piareertut

Tallimanngornermi allagartartaartitsinermi politiitut naammasserlaat soraarummeerutitik tiguaat. Taamaalillutik politiitut taagorsinnaalerput, Nunatsinni ulluinnarni toqqissisimatitsinissamut piareersimalersut.

- Nuanneqaat politiitut naammassilluni. Inuiaqatigiinni sulinissaq aammalu toqqissisimatitsinissaq annertuumik akisussaaffiliivoq, kisianni qilanaaqaanga, politiitut naammasserlaat ilaat Poul Kreutzmann oqarpoq.