Politiit: Angut ujaarineqartoq tigusarineqarpoq toqutsisutullu pasineqarluni
Sisamanngornermi ullaakkut angutip Nuussuarmi Iggiaani toqungasup nassaarineqarneranut atatillugu, angut ujaarineqartoq Nuummi politiit tigusaraat.
Nuummi Politiit ujaarineqartoqullumi tigusarivaat, taannalu maanna toqutsisimasutut pasineqarpoq, arfininngornermilu tunngaviusumik inatsit malillugu killisiorneqassaaq. Politiit tusagassiuutinut nalunaarummi ilisimatitsipput.
- Nuummi Politiit ippassaq tusagassiutit aqqutigalugit ujaasineq ingerlappaat , tassungalu atatillugu innuttaasut arlallit Politiinut saaffiginnissimapput ujaarineqartoq pillugu, paasissutissanik apuussillutik. Nuummi Politiit innuttaasut qutsavigivaat ikiuunnerannut, tusagassiuutinut nalunaarummi oqaatigineqarpoq.
Politiit attaveqarfigikkit
Nuummi Politiit innuttaasut pisumut paasissutissanik ilisimannittunut attaveqarusupput kiisalu ujaarineqartup assinga nittarsaannerata kingorna takunnissimasunik attaveqarusupput.
Nuummi Politiit oqarasuaataat normua 70 14 48.
