Qaannamik pissartanngorniunnerit Kommuneqarfik Sermersuumi Isumaginninnermut Suliffeqarnermullu Ataatsimiititaliap siulittaasuanit Charlotte Ludvigsenimit (IA) ammarneqarput. Borgmester Asii Chemnitz Narup peqataasinnaannginnerminik nalunaarsimavoq.

Charlotte Ludvigsen oqalugiarnermini ilaatigut ima oqarpoq: ”Namminermi uagut timersuutigaarput - inuiattut uatsinniittuaannartussaq. Isikkamimmi assammillu arsarneq qiviarutsigit, timersuutaapput avataaniit eqqunneqarsimasut, qajartorsinnaanerli kalaallini uatsinniittuarsimavoq ukiut 1000-it sinnerlugit. Ukiuni untritilikkaani amerlanerni piniutitut angallatitullu. Taamaammat qajaq assut pingaaruteqarpoq; inuuniutaavoq, ukiorpassuarni malitsigisimasarput, siuaassatsinnullu pituutarisarput. Inuiattut inuttullu inuuniallaqqissutut, malartaasillaqqissutsitsinnut nakuussutsitsin nullu qajaq ersiutaavoq. Tamaammat nuannaarutigingaarpara tusaallugulu takusinnaagakku qajartornerup soqutigineqarnera maani qaffakkiartoqqilersimasoq - ingammik inuusuttut akornanni.  Amerliartuinnartummi timersuutitta pisoqaanersaat aallartittarpaat, amerliartuinnartullu ukiumoortumik pissartanngorniunnernut peqataasarlutik, Charlotte Ludvigsen oqarpoq.

Qajartortartut 130-t missaanniittut Uummannammit, Qaarsunit, Ilulissanit, Sisimiunit, Qaqortumit Nuummillu pisut ukioq manna qaannamik pissartanngorniunnernut Nuummi juulip 11-anit 21-anut ingerlanneqartumut peqataapput. Taakkua saniatigut nunanit allanit peqataasut qulit missaanniipput, taakkuali nunatsinni pissartanngorniunnernut ilaanatik. Nunanit allaneersut USA-mit (arlallit Alaskamit), Japanimit, Taiwanimut, Norgemit Danmarkimillu aggersuupput.

Qajartortartoqatigiit amerlanerpaat 40-t missaanniittut Nuummit aaqqissuussiviusumit pisuupput. Sisimiunit peqataapput 26-t, Qaqortumit 25-t, Ilulissanit 17-it, Uummannamit qulit Qaarsunillu marluk.

Avataaneersut amerlanerit pingasunngornermi tikipput, ullorlu taanna naalagiaqatigiinneqarluni, nereqatigiinneqarluni peqataasullu nalunaarsorneqarlutik.

Sisamanngornermi pisortatigoortumik ammaanersiortoqartussaagaluarpoq, silali pissutigalugu tamanna tallimanngornermut kinguartinneqarluni.

Pilersaarutit aamma allanngortiallanneqarput, naatsumut  parrunnissaq pilersaarutaasoq tallimanngornermut kinguartinneqarmat. Taarsiullugu kinngusaqattaarnerit aallartissutigineqarput.

Unammissutigineqartussat tassaapput kinngusaqattaarneq (sisamanngorneq), naatsumut parrunneq (tallimanngorneq) aamma maqittarluni parrunneq (arfininngorneq). Saaqqusersornerit (sapaat). Isorartuumut parrunneq (pingasunngorneq), allunaariaqattaarnerit (sisamanngorneq). Iligiiaarluni parrunneq (tallimanngorneq).

Isiginnaarianit unamminerit amerlanersaat Nuutoqqami malinnaavigineqarsinnaapput.