Ataatsikkut pingasunik mittarfiliortitsilluni aarlerinassusaa appartinniarlugu
Aningaasaqarnermut Siunnersuisoqatigiit Qaqortumi mittarfissap maannakkutut isikkoqartilluni takissuseqartillunilu sinneqartoorutaasinnaanngimmat eqqarsaatigeqqinneqarnissaa siunnersuutigaat.

- Qaqortumi mittarfik imminut akilersinnaanngilaq. Qaqortumi mittarfiup takissusissaata naleqqussarneqarnissaa isumaliutigeqqinneqartariaqarpoq. Taamaaliornikkut mittarfiit pillugit ataatsimut suliassat inuiaqatigiit aningaasaqarnerannut kingunerisassaat pitsanngorsarneqarsinnaapput aammalu Qaqortumut timmisartuussinermi anguniakkat suli anguneqarsinnaassallutik, Aningaasaqarnermut Siunnersuisoqatigiit ilaatigut inassuteqarput.

Ataasiakkaarineq

Siunnersuisoqatigiit aamma siunnersuutigaat, mittarfiit ataasiakkaarlugit sanaartorneqassasut.

- Mittarfiit pillugit ataatsimut suliassanut atatillugu annaaratarsinnaasat annertuumik annikillisinneqarsinnaapput mittarfiit pingasut ataatsikkoortingajallugit sanaartornagit immikkoortukkuutaarlugit sanaartorneqarpata. Taamaaliornikkut sanaartornernit siullernit misilittagarineqalersut atorluarneqarsinnaalissapput, Aningaasaqarnermut Siunnersuisoqatigiit allakkiaminni Naalakkersuisunut allapput.

Naalakkersuisut Aningaasaqarnermut Siunnersuisoqatigiit inassuteqaataat malissappassuk ukiut arlallit qaangiuppata aatsaat Kujataa mittarfittaassaaq.

Aningaasaqarnermut Siunnersuisoqatigiit ima itisiliipput:

- Taamaasillutik mittarfiliornissat iluanaaruteqarneruffissartai ingerlasinnaanngussapput, pilersaarutip aningaasartuutaanerusussartaasa naammassinnginneranni. Tamanna aamma aningaasarsiornikkut pissutsit eqqarsaatigalugit siunertamut tulluarnerussaaq. Tulleriiaaraluni mittarfinnik sanaartornerup aamma mittarfinni ataasiakkaani ilinniakkat misilittakkallu pilersaarutinut tulliuttunut ingerlateqqinneqartarsinnaanerinik periarfissiissaaq, allakkiami allassimasimavoq.

Mittarfik naanneq pisariaqartitsinermut naammassinnittoq

Kujataani mittarfissap inuiaqatigiinnullu aningaasaqarnikkut aarlerinaataasinnaasut pillugit aamma allassimasoqarpoq:

- Mittarfissat aarlerinaataat aamma malunnaatilimmik annikillineqarsinnaavoq Qaqortumi mittarfissap tulluussarneratigut – mittarfik naannerusoq angallannikkut politikkikkut pisariaqartitanik naammassinnissaaq, sanaartornermili aningaasaliissutit ikinnerujussuussallutik. Pilersaarutip immikkoortortaa taanna nammineq aningaasaqarnikkut imminut akilersinnaanngimmat, tamanna annertuumik mittarfissani aningaasaqarnermik pitsanngortitsissallunilu aarlerinaatinik annikillisaassaaq. Tamanna aamma missingersuutit pillugit inatsimmi, piffissaq ungasissoq eqqarsaatigalugu aningaasaliinissamut Aningaasaateqarfimmi aningaasaliinerit sapinngisamik annertunerpaamik pissarsiaqaataanissaannik piumasaqaammik eqquutsitsissaaq.