Kalaallit Airportsip tusagassiuutinut nalunaarutaanni tamanna atuarneqarsinnaavoq.

- Inatsisartunut qinersineq aammalu qinersereernerup kingorna Naalakkersuisunngortitsinissap tungaanut piffissaq Nuummi aamma Ilulissani sanaartornermik suliassat neqeroortitsivigineqarnerannut sunniissasut mattunneqarsinnaanngilaq, taamaalilluni Nuummi mittarfiliassap aallartinnissaa 2018‐imi oktobarimi pisussatut  pilersaarutigineqartoq, kinguaattoorsinnaalluni. Kisiannili Ilulissani suliassat aallartinnissaannut aamma Qaqortumi suliassap neqeroortitsivigineqarnissaanut piffissamut pilersaarut qinersinermit sunnerneqassasoq naatsorsuutigineqanngilaq, Johannus Egholm Hansen, siulersuisunut siulittaasoq oqarpoq.

Naatsorsuut siulleq

Kalaallit Airportsip aamma naatsorsuutini siulleq saqqummiuppaa, piffissami qaammatini 18-ini naatsorsuiffiusoq. Ingerlatseqatigiiffiup katillugu 54 millionit koruunit atorsimavai, taakkunannga 10 millionit koruunit ingerlatsinermut atorneqarlutik.

Mittarfinnik suliniutit ineriartortinneqarnerinut toqqaannartumik 44 millionit koruuninik aningaasaliisoqarpoq, aningaasallu imatut agguarneqarput:

Suliassanut pingasunut tamaginnut suliassat akimorlugit, 10 mio. koruunit missai 

• Nuuk, 10 mio. koruunit missai 
• Ilulissat, 15 mio. koruunit missai 
• Qaqortoq, 9 mio. koruunit missai

- Siulersuisut naatsorsuutit naammagisimaarluarpaat aammalu paasillugu Nuummi, Ilulissani aamma  Qaqortumi mittarfiliassanut suliassat ineriartortinneqarnerat, ingerlatseqatigiiffiup pilersinneqarneraniilli,  siuarsimasorujussuusoq, aammalu ingerlatseqatigiiffik aningaasanut aningaasaliissutaasunut annertuumik  pissarsisimasoq, siulersuisunut siulittaasoq oqarpoq.