Skip to main content

RAL-ip AG-mi allaaserisaq saassuppaa

Royal Arctic Linep allaaserisaq AG-mi saqqummersinneqartoq aamma nittartakkamit nutaarsiassaqartitsivimmit Sermitsiaq.AG-mit issuarneqartoq assut naammagisimaanngilaa, kisianni AG-mi aaqqissuisoqarfik itigartitsivoq.

Aviisimi AG-mi allaaserisap Royal Arctic Linemi pisortaaneq Verner Hammeken qisuariartippaa.

Qulequtaralugu: Ilumuunnginneraaneq: Royal Arctic Line qinnuluunngilaq, Verner Hammeken allappoq, tamannalu Sermitsiaq.AG-p tamaat saqqummiunniarlugu aalajangerpaa:’

’’Sermitsiaq.ag-kkut kiisalu AG maajip 16-ia 2018-imi saqqummersinneqartumi kukkusumik saqqummiussisoqarpoq Royal Arctic Line tyskit aningaaseriviannut KfW-mut uteriittariaqarsimasoq qinnuloortariaqarsimasorlu.

Qinnuloortoqarnikuunngilaq. Sinneqartooruteqarnissamut piumasaqaatip atorunnaarsinniarneqarnera ajunngitsumik ingerlasimavoq kiisalu aningaaserivimmit pineqartumit tatiginnittoqarluarsimalluni.

Allaaserineqartuni allaqqavoq Royal Arctic Line ”atukkaminut akiliinissaminut kinguartitsinissamik” qinnuteqarsimasoq. Tamanna ilumuunngilaq. Qinnuteqartoqarnikuunngilaq aammalu atukkat akilerneqarnissaannut kinguartitsinissamik pisariaqartitsisoqarsimanani.

Aammattaaq allaaserineqarsimavoq ”siorasaarisoqarpoq umiarsuarnut nutaanut taarsigassarsititsineq piffissami sivikitsumiussasoq. Taamaalillunilu akisunerujussuulluni”. Tamanna aamma ilumuunngilaq. Siorasaarisoqanngilluinnarpoq. Naamerluinnaq.

AG-mi naqiterneqarsimasumi aamma allaaserineqarsimavoq Knud Østermanni, kukkunersiuisoq naalagaaffimmit kakuerisaanikoq, isumaqartoq Royal Arctic Line amigartooruteqarnissamut aningaaserivinnut paasissutissiissuteqarniarsimanera ”piffissaq eqqorlugu pisimanngitsoq”. Tamanna kukkunersiuisumit eqqarsaatersuutaannaavoq. Royal Arctic Lineminngaanniit anigaaserivik septembarip 28-ia 2017-imiilli saaffigineqarsimavoq, ataatsimullu aaliangiunneqarsimavoq aatsaat ukiumut nalunaarusiaq naammassineqareermat iliuuseqartoqassasoq. Royal Arctic Lineminngaanniit 2017-imi 2018-imilu ukiumut naatsorsuutit suliarineqarnerinut tatigeqatigiilluni suleqatigiittoqarsimaneranit waiverinnattoqarsimavoq. Tamannalu pissusissamisoorpoq.

Qulequtarineqartut saqqaanilu saqqummiunneqartut ilumuunngillat ajoqusiisinnaallutillu. AG-minngaanniit allaaserisap saqqummersinnginnerani allaaserisaq Royal Arctic Linemut takutinneqaqqaarsimasussaagaluarpoq. Royal Arctic Lineminngaanniit isumaqarpugut qulequtarineqartut aviisillu saqqaani saqqummiunneqartut iluamik tunngaveqanngitsut inuiaqatigiit iluanni asuli puupassaarisinnaasut. Aningaaserivinninngaanniit tapersersorneqanngitsutut isigineqalersinnaavugut. Tatiginnilluinnarpummi.’’

AG-mi aaqqissuisoqarfiup akissutaa

Royal Greenlandip taarsigassarsinissamut piumasaqaatit tyskit aningaaserivianni KfW-mi malissimanngikkai piviusuuvoq. Tamatuma saniatigut RAL-ip 2017-imi angusaa ajorpallaarpoq, tassami aningaaserivik piumasaqarpoq, angusat (EBIT) ernianut aningaasartuutit 1,5-imik amerlisarneqartussaammata.

RAL-ip ukiumut nalunaarutaani qupperneq 15-imi aningaasaqarnikkut nalorninartut ataanni ersarissumi allaqqavoq, Royal Arctic Linep qullersaasa februaarimi 2018-imi KfW taarsigassarsiat pillugit ataatsimiissimasut. Ukiumoortumik nalunaarummi allaqqanngilaq, RAL-ip septembarimi 2017-imili KfW attaveqarfigisimagaa aamma amigartoorneq paasissutissiissutigalugu. Tamanna attuumassuteqarsimagaluarpat, naatsorsuutini atuarneqarsimasinnaassagaluarpoq. Taamaamma Knud Østergaardip oqaaseqaataa attuumassuteqarpoq.

Aammattaaq allaaserisami Verner Hammeken ima oqaaseqartinneqarpoq:  

Suliffeqarfiuvugut patajaatsumik ingerlanneqartpq. Aningaaserivitta uagut allanngortiterileruttornerpullu upperaat.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

MEST LÆSTE

SENESTE NYHEDER