- Matumuuna tusagassiorfinnut nalunaaruteqarluta pilersaarutip novembarip qulingani 2017-imi nassiussatta killiffia paasissutissiissutigerusupparput, Royal Arctic Line ullumi tusagassiuutinut nalunaarutaani, oqaatigineqarpoq.

Taamatut pilersaaruteqarneq umiarsuaatileqatigiiffiup atuisunut tatigeqatigiinneq pilerseqqinniarpaa.

Atuaruk: Royal Arctic Line pilersaarusiorpoq

Ukiumut peqqumaatissat apuunneqarnissaat attakkaat

- Pissusissamisuunngitsumik pisoqaraluartoq Avannaani ukiornissaanut pilersuinerit naammassineqarnissaat aalajangiusimavarput. Avannaani qerititsiviit imaarneqarnissaat pilersaarut malillugu aamma ingerlavoq. Sinerissami illoqarfiit angallavigineqarnerat ukiortaartinnagu aamma iluarseqqinneqassaaq, Royal Arctic Line nalunaaruteqarpoq.

 - Novembarimi ulapittupilussuuvugut decembarimilu aamma suli ulapilluta, umiarsuilli atlantiku ikaarlugu assartuisut siornatigutulli siuleriiaattoorutiginerinik ajornartorsiutit atuukkunnaarput, aamma nalunaarutigineqarpoq.

Atuaruk: RAL: Nunaqarfiit pilersorniarlugit immikkut iliuuseqarneq

Kinguaattoornerit

Umiarsuaatileqatigiiffiup paasissutissiaraa, umiarsuit Naja Arctica aamma Malik Arctica silarlunnera pissutigalugu ullut marluk pingasullu akornanni kinguaattooqqasimasut.

- Tamannali Upernavimmi ukiornissaanut pilersuinermi ikiuisussat ilaqqinnissaannik periarfissiivoq, naak umiarsuup kinguaattooqqanera sivittoqqilaaraluartoq. Pingaarnerpaarli tassaavoq Malik Arcticap 1750-ip (umiarsuup normua aaqq.) ukioq manna nassiussanik kingullernik ukiortaartinnagu apuussinissaa, RAL paasissutissiivoq.

Malik Arctica taamaalilluni Nanortalimmut ullormi 25. december tikissaaq Qaqortumullu, Narsamut, Paamiunut, Sisimiut Nuummullu Sisimiunullu ulloq 29. december sioqqullugu tikissalluni. Aasiaat Irena Arcticamik pilersorneqarpoq, aamma ukiortaartinnagu tamanna pissaaq. Tamatuma kingorna angallannermut pilersaarut iluarseqqinneqassaaq.

Status

Pilersaarutinilu saqqummiunneqartumut atatillugu suut angusimanerlugit umiarsuaaatileqatigiiffik assigiinngitsunik saqqummiussivoq:

• Containerinik imaqanngitsunik nassiussanillu immikkut ittunik pilersuisussanik marlunnik umiarsualiineq naammassineqarpoq, tamanna neriuutigisatsitut ullunik marlunnik kingusinnerusukkut pigaluartoq, containerinillu imaqanngitsunik amigaateqarneq maanna qaangerneqartutut nalilerparput.
• Avannaani qerititsiveqarfiit imaarnissannik suliaq aamma inniminniinerit tigusagut naapertorlugit ingerlanneqarpoq.
• Ukiornissaanut palletsit amerlanersaannut tunngatillugu siammarterneqareerput siammartiterisoqassallunilu.
• Nuup umiarsualiviani aallartisarneq suli ingerlavoq ukiullu ulapiffiunnginnerpaaffiani ingerlateqqinneqassalluni.
• Ukiornissaanut pilersuinermi nunaqarfinnut nassiussat isumaginissaannut sulisunik sinerissameersunik tikisitsivugut aammalu Aalborgimi suleqatitsinnit ikiorneqarluarluta.

Royal Arctic Line-p paasissutissiaraa, Upernaviup Uummannallu pigisaannut Qeqertarsuullu Tunuanut ukiornissaanut pilersuinerit kingulliit aaqqissornissaat sulisunit suliarineqaleruttortut.

Nassiussat kingulliit

- Nassiussat kingulliit sapaatit akunnerini tullerni marlussunni apuunneqarnissaat naatsorsuutigineqarpoq. Pinngortitaq peqqarniitsoq inuuffigaarput taamaammat ukiornissaanut pilersuinerit piareertutut nalilissallugit siusippallaarpoq, pilersaarutilli maannamut malinneqarput, aamma Pajuttaatip pujortuleeraq ajornartorsiortoq ikiorlugu Ilulissanut sapaatiummat kalittariaqarsimagaluaraa, RAL allappoq.

Umiarsuaatileqatigiiffiup tikkuarpaa, 'piffiit nutaat atulernissaannut piareersaatitut 2017-ip ingerlanerani allannguingaatsiarsimanertik. Systemit nutaat, umiarsualivik nutaaq, aaqqissuussaaneq nutaaq suleriaatsillu nutaat.

Tatiginassuseq sunnerneqartoq

- Allanngortiterinerit tamakku pissutigalugit sulisorpassuit immikkut ittumik sulissuteqartariaqarsimapput. Allanngortiterinerit Royal Arctic Linep tatigineqarneranik sanngiillisaataasumik sunniuteqarsimanerat qularutissaanngilaq. Tamanna paasisinnaalluarparput, umiarsuaatileqatigiiffik nassuerpoq.

- Maannali oqaatigisinnaanngorparput systeminik allanngortiterinerit qaangereerlutigit siutsinniikkunnaartullu. Allanngortiterinerit pinngitsooratik pisussat pineqarput. Royal Arctic Linetut nutaatut ilikkagaqarluarpugut. Sullitavut peqatigalugit pitsannguutissat ingerlaavartut suliarinissaat qilanaarivarput, taakkumi ukiumi nutaami siusissukkut sullitatsinnut ajornannginnerulersitsissapput uatsinnullu pisariillisaataallutik, RAL nalunaaruteqarpoq.

Aamma atuaruk: RAL-p kukkuluttornerit aaqqiissuteqarfigai