RAL: Containerilerineq patajaatsumik ingerlasoq
Royal Arctic Line 2018-imi containerit assartortarneri pillugit uuttortaaqqammerpoq. Uuttortaanerullu takutippaa ataasiakkaat eqqaassanngikkaanni assartuineq patajaannerulersimasoq
Namminersorlutik Oqartussat umiarsuaatileqatigiiffia Royal Arctic Line, ukioq kingulleq qarasaasianik atortorussaarutinik taarsiinermi kingorna assartuinermik ajornartorsiuteqarsimasup containerinik assartuinera patajaallisimavoq.
Umiarsuaatileqatigiiffik tusagassiuutinut nalunaarummi taama nalunaaruteqarpoq.
- Sapaatip akunneri arlallit kukkunerit 0 procentimiissimapput sapaatip akunneri ataasiakkaat containerit ataaseq marlulluunniit kukkussutaasarsimasut eqqarsaatigissanngikkaanni (kukkuneq procentinngorlugu 0 procentimiit 0,2 procentip nalaani inissisimavoq), Royal Arctic Line allappoq.
Royal Arctic Line naapertorlugu, suleriuutsinik nutaanik pitsanngorsaanikkut aammalu sulisut arlallit tunniusimalluarlutik suliaqarsimaneranit pissuteqartoq, tassanilu siusinaartumik allanaatillit eqqumaffigineqartarnerinik ukkararinnittoqarluni.
Pissutsilli allat allannguisinnaapput
Royal Arctic Line-li allappoq, umiarsuit allanngorartillugit containerinik assartuineq qajannartuaannassasoq
- Silap pissusaa allallumi aamma pilersaarutitsinnut ingerlatsiniarnitsinnullu kaalluaasinnaasarput. Tamannalu nunarsuarmioqatitsinnut tamanut aamma atuuppoq. Taakkualu saniatigut aamma kujammut assartuititsinerup iluani paasissutissanik tunniussisarnermi atuisutta Royal Arctic Linellu akornanni paarlaaqatigiittarnermi pitsanngorsaavugut. Umiarsuuateqarnerulli iluani ingerlatseriaaseq isigissagutsigu patajaalluinnartumik ingerlasoqarpoq. Tamannalu Royal Artic Linemut nutaajusumut angusaq pingaartuuvoq, umiarsuaatileqatigiiffik allappoq.
Royal Arctic Linep ilanngullugu paasissutissiaraa, umiarsuaatileqatigiiffimmit allanngoriartorneq aallartisarneqarsimasoq, Kalaallit Nunaatalu ajornannginnerusumik niueqatigineqarsinnaalernissaa siunertarineqarluni.
- Qulakkeerniarparput siunissami Kalaallit Nunaata ajornannginnerusumik toqqaannarnerusumillu niueqatigineqarsinnaalernissaa. Kalaallit Nunaat, umiarsuaatileqatigiiffinnut nunarsuarmi niuernermut attavilinnut, atatilissavarput. Taamaasiortoqassappat allannguinerit annertuut pisariaqarput. Tassami ingerlaasitoqaq qaquguluunniit unittoortussaammat. Paasissutissat isiginiaraanni patajaallisaanitsinnit takusinnaavarput Kalaallit Nunaata ajorannnginnerusumik niueqatigineqarsinnaalernissaanut pitsanngorsaasoqaannavittoq, Royal Arctic Line allappoq.
