Sara Olsvig: Takornartanik uumissuineq akiorlugu
Inuit Ataqatigiinni siulittaasup, Sara Olsvigip, kikkut tamarmik atorfissaqartinneqarlutillu inissaqartinneqartariaqartut naqissusiivoq. Takornartanillu uumissuinerup akiorneqarnissaanut piffissanngortoq, taanna isumaqarpoq.
‘’Naleqartitatigut oqallinnerit qinersinermi aalajangiisuussapput’’ qulequtaralugu Sara Olsvig tamanut Nunatsinnut tikilluaqqusivoq.
Avammut alakkaamasaqarneq kissaatigigaat
- Inuit Ataqatigiit inuiaat iluminni allanullu ammasuunermik takutitsisut pilersikkumavagut. Avammut alakkaamasaqarneq assigiinngisitaarnerlu kissaatigaavut. Inuit Ataqatigiit isumarput erseqqippoq – partiiuvugut tamanik inissaqartitsisoq. Isumaqarpugullu nunarput tamanut inissaqartitsisuusoq, Sara Olsvig tusagassiuutinut nalunaarummi allappoq, tassanilu aamma nuna allamiunit ulorianartorsiortinneqanngitsoq naqissuserpaa.
Nunatta siunissaanut piffissamut aalajangiisuusussamut appakaattugut partiimi siulittaasoq isumaqarpoq.
- Inuit taakkuinnaavugut ataatsimoorlutalu inuiaqatigiinnik nukittuunik imminullu napatittunik sanarfinissamut anguniagaqaqatigiippugut. Aporaanneq ajornartorsiutinik sunilluunniit aaqqiineq ajorpoq ataatsimuulersitsinerlu ajorluni. Immikkoortitsinermit ajattuinermiillu nuannersunik pilersitsisinnaanngilagut.
Assigiimmik pinninneq
Naligiissitsinissamiksiuarsaanissaq partiip sammineqarnissaa qulakkeerniarpaa, tamannalu tunngaviusumik inatsisiliorluni sulinermi naligiissitsinerup qitiutinneqarnissaa qulakkeerniarlugu.
- Inuiaqatigiinni oqaatsit aammalumi sumiuussuseq tunngavigalugu aporaannerit suli nukippassuarnik atuiffigisarivut takusinnaavarput. Ukiuni makkunanerpiaq naligiissitsinissamik siuarsaanissaq pingaartipparput. Kikkut tamarmik ilaanissaat qulakkeertariaqarparput, kikkut tamarmik inissaqassapput. Taamaammat tunngaviusumik inatsisiliorluni sulinermi naligiissitsinerup qitiutinneqarnissaa qulakkiissavarput.
Takornartanik uumissuineq akiorlugu
- Tamatta atorfissaqartinneqarlutalu naligiippugut. Inuit assigiinngisitaartut suleqatigiissinnaanerat piffissanngorpoq, aamma oqaluttuarisaanitsinni annernarsinnaasunik pisoqarsimagaluartoq. Ingerlaqqittariaqarpugut ataatsimoorluta, taanna oqarpoq.