Maanna ileqqunngornikuuvoq. Skakkertartut klubbiat Hrókurinnip Islandimeersup skakfestivalertitsiartorlutik ukiuni 15-ini Tunu tikittarpaat. Taamaakkaluartoq ukiormanna allaaneruvoq. Tassami inuit qitiusut ilaat maanna peqataasinnaajunnaarsimavoq. Tasiilami najugalik qiimasoq, Gerda Vilholm, kinguaariinni meerarpassuarnik skakkertitsilluni sunngiffimmi sammisaqartitsisartoq, siorna toqukkut qimaguppoq.

Anersaakkulli peqataassaaq. Tassami sapaatiuppat Gerda eqqaaniarlugu Tasiilami skakfestivalertitsisoqassaaq.

- Tasiilami ikinngutigut naapinnissaat qilanaaraarput, Gerdallu eqqaaneqarnera ataqqillugu, taanna ikinngutaalluarnerpaalluni illoqarfimmi meeqqaanut tapersersuisarpoq, Hrókurinnip præsidentia, Hrafn Jökulsson, tusagassiuutinut nalunaarummi allappoq.

Kisianni Tasiilamut angalannginnermi Hrókurinnip Kulusuk tikeraareerpaa. Meeqqat tassani skakkernermut ilinniartinneqarput, Hrafn Jökulssonilu aqutsisoralugu unammisoqarluni. Tamatuma saniatigut Inga Maria Brynjarsdottir eqqumiitsuliornermik ilinniartitsivoq.

- Islandip Kalaallit Nunaatalu akornanni ikinngutigiinnermik atajuartitsinermut ikiueqataasunut tamanut qujamasuppugut. Kulusummut tikilluni seqinnertoq nuannerpoq, Hrafn Jökulsson oqarpoq.

Kulusummi assilisat allaaserisap qulaani takusinnaavatit.