Se billeder: Slettemark ooqattaasarnermi sølvinnattoq
Ujakkaarluni ooqattaasartartoq, Sondre Slettemark, Arctic Winter Gamesimi unamminermini kingullermi angusarissaarluni sølvinnappoq.
Ujakkaarluni ooqattaasartartoq, Sondre Slettemark, ulluni makkunani Canadami Arctic Winter Gamesertoqarnerani marlunnik sølvinnappoq.
Sisamanngornermi ujaminnattaami aappaa 5 kilometerimut ataatsimut aallarnermi pissarsiaraa. Taannalu aamma Arctic Winter Gamesimi arpannera kingulliuvoq. Taamaalilluni arpannerni pingasuni marlunnik ujaminnappoq.
Pisoq nuannerluinnartoq
Sermitsiaq.AG-p ujakkaartartoq 13-nik ukiulik oqaloqatigaa.
- Arctic Winter Games aaqqissuussaq torralluinnarpoq. Ilumut. Inuppassuit nutaat naapinneqartarput, inuppassuillu nunani allaneersorpassuit oqaloqatigineqartarlutik, maaniilluni nuannersorujussuuvoq, Sondre Slettemark oqarpoq.
Ikinngutitaartorsimalluni taanna oqarpoq.
- Aap, nutaanik amerlasuunik ikinngutitaartorpunga, kingusinnerusukkullu aamma attaveqarfigissajunnarsivakka. Alaskameerput, Abertami allarpassuarniillu, taanna oqaluttuarpoq.
Kuultinnangajattoq
- AWG-mi ujaminnannissat naatsorsuutigisimaviuk?
- Ilaatigut naatsorsuutigaara, ilaatigullu naatsorsuutiginagu. Unammisassakka qanoq pikkoritsiginersut nalusimavakka. Kikkut unammissanerlugit aamma nalullugu. Ujaminnalluni nuannerluinnarpoq, Sondre Slettemark akivoq.
Inuusuttut ooqattaasarluni ujakkaartartup unamminermini kingullermi qanoq issimanini nassuiarpaa:
- Kuultinnangajakkaluarpunga, kisianni ajugaasoq tulluarpoq. Ullumikkut taanna uanniit pitsaaneruvoq. Arpannerup nalaani iginnialerama pallunganeq ukkatarisorujussuuara. Arpannertaani ajugaasumit sukkanerulaarpunga, kisianni pitsaanerusimasinnaagaluarpunga, Sondre Slettemark oqarpoq.
Peqataaqqinniartoq
Ukiuunerani unammiuaarnernut peqataanermini ilikkagarpassuaqarnerarpoq.
- Pallungasarnera igittarneralu eqqarsaatiginerusariaqarlugu ilikkarpara. Maaniinninni ilikkagaqaqaanga. Ukiut marluk qaangiuppata Arctic Winter Gamesimut peqataaqqinnissara neriuutigisorujussuuara, Sondre Slettemark oqarpoq.
Unammineranit assit uani allaaserisap qulaani takukkit.