Sermersooq: Innuttaasut maanna eqqakkatik malinnaaffigisinnaalerpaat
Ukiup ingerlanerani qaammatit arfineq-marluk siulliit ingerlanneranni Kommuneqarfik Sermersuumi eqqagassalerisut innuttaasullu eqqakkat 10.508 tonsit ikuallatassatut suliarineqartussatullu tunniuppaat
Una qaammat aallarnerfigalugu qaammatikkuutaartumik killiffik pillugu Nuummi Eqqagassaleriffik kommuneqarfimmi innuttaasunut nalunaaruteqartassaaq, Kommuneqarfik Sermersooq nittartakkamini taama ilisimatitsivoq.
Tassani ilaatigut ukiup siuliinut sanilliullugu eqqakkat qanoq agguataarlugit annertussuseqarnersut kiisalu eqqakkat qanoq ittut Kommuneqarfik Sermersuumit tigoorarneqarnerpaasarnersut takusinnaassavatit.
Illoqarfinnit nunaqarfinniillu allanit
Nuummi eqqakkat katersorneqarsimasut kiisalu eqqakkat annertuut Ikuallaavimmit aamma Eqqakkanik Tigooraavimmit tigoorarneqartarput, kommuni ilisimatitsivoq. Tamatuma saniatigut Kommuneqarfimmi illoqarfinniit nunaqarfinniillu Tunumiittunit kitaaniittunillu eqqakkat tigoorarneqartarput. Taamatuttaaq aasaanerani, sanaartornerup annertusiffiani, sanaartornermit eqqakkat annertuut tigoorarneqartarput.
Qaammatini tulliuttuni Kommuneqarfik Sermersuumi Eqqagassaleriffimmit qaammammut nalunaarutini qulequttat assigiinngitsut sammineqassapput. Ilaatigut eqqagassat assigiinngitsut kiisalu eqqakkat atorneqaqqittarnerinut tunngasut atuarsinnaassavatit.
