- Nuummi 2.200 meterimik Imarpik qulaallugu timmisartunut mittarfiliortoqassasoq, aammalu nunatsinni angalaneq pisariinnerulersillugu nunatsinni attaveqaqatigiinneq tamarmi kivinneqassasoq, ilaatigut Inuit Ataqatigiit Naalakkersuisut isumaqatigimmagit nuannaarutigaara.

Inuit Ataqatigiit mittarfiit pillugit saqqummiussaat pillugu angallannermut naalakkersuisoq Simon Simonsen oqarpoq. 

Mittarfiliornerit ataasiakkaarlugit sananeqartariaqartut Inuit Ataqatigiinnit sulissutigineqarusuppoq, tamannali Naalakkersuisunit peqataaffigineqarumanngilaq.

- Erseqqissassavara Naalakkersuisut Ilulissani aamma Nuummi 2.200 meterimik mittarfiliortoqarluni aammalu Qaqortumi 1.500 meterimik nunap immikkoortuani mittarfiliortoqarluni aaqqiissutissap ataatsimoortuunissaa Naalakkersuisut aalajangiusimammassuk aammalu suli sulissutigalugu.

- Tamatuma saniatigut aamma erseqqissassavara aaqqiissutissamut ataatsimoortumut misissueqqissaarnerit suliarineqarmata, taakkunani takutinneqarluni inuiaqatigiinnut taamaalillunilu aamma innuttaasunut sipaarutissaqartoq – mittarfiit sananeqanngippata iluanaarutissat taakkua pissarsiarineqarsinnaassanngillat, oqarpoq.

Naalakkersuisut siunnersuutaannut assingusoq
Inuit Ataqatigiinniilli saqqummiunneqartut Simon Simonsenimit tigulluarneqarput:

- IA-p saqqummiussaa arlalitsigut Naalakkersuisut siunnersuutaannut assingusoq naammagisimaarlugu maluginiarpara, taamaattumillu Ukiaanerani ataatsimiinnerup nalaani Inatsisartut ataatsimiittarfianni inatsisissatut siunnersuutip suliarineqarnissaanut neriulluarpunga. Inuit Ataqatigiit imatut paasivakka, naalagaaffik tapersiisinnaasoq taamaalillunilu aamma mittarfiliassani peqataasinnaasoq, Naalakkersuisut danskit naalakkersuisuinut isumaqatigiissuteqarnerat partiip taperseraa.

Naalakkersuisut danskit naalakkersuisuinut isumaqatigiissutaat piviusunngortinneqassappat, danskit naalakkersuisuinut annertunerusunik isumaqatigiissuteqartoqartussaasoq, Simon Simonsen oqarpoq.

- Tamatumunnga ilaatigut isumaqatigiissutip aamma mittarfinnut sanaartornissamut inatsisip Inatsisartuni qanoq suliarineqarnissaa apeqqutaassaaq. Mittarfiliassanut naalagaaffiup tapersiinissaa pillugu ataatsimoorussamik siunnerfeqarnissaq pillugu isumaqatigiissutip sukumiisortaasunik tamaginnik imaqannginnera pissusissamisoorpoq. Isumaqatigiissut pingaarnernut tunngassuteqarpoq, naalakkersuisuni isumaqatigiissutigineqartoq. Kisiannili aamma isumaqatigiissutaavoq, Inatsisartuni tamanna taperserneqassappat, mittarfiliassanut ataatsimoortunut nukittorsaataangaatsiartussaq.

Innuttaasut peqataatinnissaat
Simon Simonsen Kujataaneeqqammerpoq, tassani ilaatigut innuttaasut, inuussutissarsiortut aamma kommuni attaveqaqatigiinneq pillugu oqaloqatigisimallugit. 

- Suliassat taama annertutigisut piviusunngortinneqartussanngorneranni, siunissami attaveqaqatigiinnermi suliassanik nutaanik taakkuninnga iluaquserneqartussat ingerlaavartumik oqaloqatiginissaat pingaaruteqarpoq. Taamaattumik suliassat annertuut taakkua nunatsinni ineriartortitsinermut iluaqutaasussat pillugit oqaloqatigiinnermi najukkameersunik akuutitsinissamik Inuit Ataqatigiit kissaateqarnerat tapersiinnarsinnaavara, angallannermut naalakkersuisoq oqarpoq.