- Illoqarfiit Narsaq Qaqortorlu atassuserneqarnissaanut aqqusineq 16-17 kilometerisut takissusilimmik ikaartarfiillu katillugu 1,5 kilometerit missaaniittut kiisalu biilinik useqarsinnaasoq ikaartaateerannguaq kisimi amigaataapput. Qaqortoq aamma Narsaq taamatut atassuserneqassagaluarpata, Kujataanut iluaqutaalluassaaq.

Josef Petersen Siumumi Inatsisartunut qinigassanngortittoq, qineqqusaarummi taamma allaaserisaqarpoq, aqqusineq ukiuni arlaqanngitsuni pilersinneqarsinnaasoq taanna isumaqarpoq.

Suliniut piviusunngortinneqassappat taassuma oqarnera naapertorlugu Kujataanut iluaqutaasorujussuussaaq.

Siunissamut aningaasaliineq

- Inuussutissarsiortut tassani amerlanerusunik periarfissaqalissapput, Qaqortumi aamma mittarfiliortoqartussaammat. Takornarissat Narsamukariaannaanerussapput, tassanilu aamma pilersitsinissamut periarfissat amerlissapput, Josef Petersen erseqqissaavoq.

- Qanoq aningaasalersorneqassava?

- Aningaasalerneqarnera Namminersorlutik Oqartussat aamma Kommune Kujalliup suleqatigiinnerisigut pissaaq. Angallassinermi kiffartuussinermut isumaqatigiissut Kujataaniinnaq 40 millionit koruuneqartoq eqqarsaatigineqassaaq. Tamanna siunissamut aningaasaliinertut isigineqassaaq, Josef Petersen akivoq, taanna sumiiffimmi eqaannerusumik angalasoqarsinnaanngornissaanik kissaateqarpoq.

- Ullumikkut qiviaraanni sikorsuaqarnera pissutaalluni imaatigut angallattoqarsinnaanngingajappoq. Illoqarfiit taakku marluk akornanni qularnaatsumik attaveqarnissaq pisariaqartorujussuuvoq. Qaqortumilu mittarfeqalerpat tamanut iluaqutaassaaq, Narsamiillu Qaqortumukarneq akikinninngussalluni. Inatsisartunut qinigaassaguma piviusunngortinnissaa taamaammat sulissutiginiarpara, Josef Petersen oqarpoq.