Siumup pilersaarutaa: Niuernermut siunnersuisoqatigiit aamma Kinami allaffik
Nunatsinni partiit annersaat, Siumut, Avammut Niuernermut Siunnersuisooqatigiinnik pilersitsiniarpoq, Kalaallit Nunaata avammut niuernerminit isertitaanik iluanaaruteqarnerulersitsisussaq, aammalu Kinami Canadamilu aallartitaqarfinnik pilersitsiniarluni.
Avammut niuernermut siunnersuisoqatigiit avammut niuernermut ilisimasaqarluartunik immikkut ilisimasalinnik ilaasortaqassasoq, Siumup qinersinermi anguniarniagaani tamanna atuarneqarsinnaavoq.
Aallartitaqarfiit marloriaatinngortinneqassapput
Kalaallit nunani allani aallartitaqarfii aamma marloriaatinngortinneqassasut, partiip aamma saqqummiuppaa.
Kalaallit Nunaat ullumikkut USA-mi aamma Islandimi aallartitaqarfeqarpoq. Nunarput aamma Canadami Kinamilu aallartitaqarfeqalissasoq, partiip pilersaarutigaa.
- Canadap, USA-p Islandillu suleqatiginerat annertunerusariaqarpoq, niuernermi aningaasartuutit appasissuutinnissaat siunertaralugu, partiip qinersinermi anguniagaani tamanna atuarneqarsinnaavoq.
Toqqaannarnerusumik niuerneq
Nunanik allanik niueqateqarneq ullumikkornit toqqaannarnerusumik pissasoq, partiip anguniagaraa. Taamaaliornikkut Nuummi mittarfissuaq atorluarneqarsinnaasoq, partiip tikkuarpaa. Tamatumunnga atatillugu mittarfissuit nutaat nunanik allanik niueqateqarnermut periusissamut pingaarutilimmut ilaasut oqaatigineqarput.
