Steen Lynge: Qaqortoq mittarfittaassaaq
Demokraatit tunuliaqutaralugu qinigassanngortittoq, Steen Lynge, Qaqortumi pilersaarutit malillugit mittarfiliortitoqarnissaanut piumasaqarpoq. - Inuiaqatigiit utaqqisinneqaqqissappata akisuupilussuussaaq, oqarpoq.
Siumut tunuliaqutaralugu Inatsisartunut qinigassanngortittoq Evelyn Frederiksen pingasunngornermi piumasaqarpoq mittarfiliortitsiniarneq inuiaqatigiinnut aningaasaqarnikkut qanoq sunniuteqassarnersoq qulaajaasoqaqqaassasoq.
Sermitsiaq.AG-ip sapaatiummat allaaseraa, Qaqortumi, Nuummi Ilulissanilu mittarfiliortitsinermi missingersuutaasimasunik sippuisoqaraluarpat Kalaallit Airports aamma Naalakkersuisut qanoq pilersaaruteqarnersut GrønlandsBankenimit ujartorneqartoq.
Aningaaserivimmi inerniliivoq, siunnersuummi sanaartortitsinissamut 3,6 milliard koruuninut akeqassangatinneqarallartumut Namminersorlutik Oqartussat 2,4 milliard koruuninik aningaasaliissuteqarsinnaasut.
Utaqqeqqinneq akisooq
Demokraatit Inatsisartunut qinigassanngortitaat Steen Lynge naapertorlugu maannamut naatsorsuinerit tamarmik takutippaat, inuiaqatigiit ilaatigut kiffartuussinissamut isumaqatigiissutinut ikinnerusunik aningaasartuuteqarnermikkut, sipaaruteqassasut.
- Kujataani ineriartorneq unittooqqavoq, angallannerlu suli aaqqiivigineqarsimanngimmat akisuupilussuuvoq. Inuiaqatigiit utaqqisinneqaqqissappata akisuupilussuussaaq, Steen Lynge oqarpoq nangillunilu:
- Maanna Siumut piumasaraa mittarfiliornissamik pilersaarutip aningaasaqarnikkut kingunerisinnaasai pillugit misissuisoqaqqaartariaqartoq. Tamanna paasinarsinnaavoq mittarfissuit angisuut pillugit
misissueqqissaartoqassappat, kisianni misissueqqissaartoqarnissaa Qaqartumi mittarfiliornissammut kinguarsaanermik
kinguneqartinneqassanngilaq.
Kujataanimi mittarfissap nalornissutigineqaqqinnissaa, Steen Lyngep kissaatiginngilaa.
- Maannakkut Kujataani innuttaasut aammalu inuussutissarsiornermik suliaqartut siunissamut pilersaarusiornissaat
aqqutissiuutissavarput, taamaammat Qaqortumi mittarfiliornissaq aallartinneqartariaqarpoq maannakkut, oqarpoq naggasiillunilu:
- Aamma mittarfissuit angisuut pillugit misissuisoqaqqaartoqassangaluarpat Qaqortumi mittarfik massakkut
sanaartornera aallartittariaqarpoq.