Amerikamiut illersornissaqarfiat Nunatsinni mittarfinnut aningaasaliinissamik isumaliutersuuteqarniarluni qanoq pilersaarnermik nalunaarut taamaallaat tigussaanngitsoq pineqarpoq. Amerikamiut pilersaarutaat sinnerit ilisimanngilagut.

Kisianni tamatuma Suleqatigiissitsisuneersup, Tillie Martinussenip, annertuumik eqqarsaasersornissaanik unitsitsinngilaq, Nuullu kujataani qeqertani nutaarluinnarmik mittarfiliornissaq saqqummerseqqippaa.

- Mittarfik 3.000 meterisut takitigisoq imaluunniit suli takineq Nuummi, sakkutooqarfittalik aamma nunatsinni sakkutooqarfimmit akileeqataaffigineqartoq pissutaalluni aamma uangut nunap iluani sillimanissakkullu politikki pissutigalugu tigussaasumik akisussaaqataasariaqarpugut, Issittumi sillimanissaq pillugu apeqqut issiaqataatilluta isumaqatigiinniarnerni suleqatitsinnut ilitsinnullu uppernassuseqassagutta, Tillie Martinussen tusagassiuutinut nalunaarummi allappoq.

Oqaatigineqareersutut isumassarsiaq nutaajunngilaq, 1999/2000-imi Tegnestuen Nuuk Angisunnguami mittarfiliornissamik takorluukkamik saqqummiussivoq. Taanna sullorsuartigut Nuummut aamma illoqarfiup immikkoortuinut nutaanut aqquteqassalluni. Kisianni maanna mittarfinnut pilersaarutaasut oqallisigineqarnerini isumassarsiaq tammariartorsimavoq.

- Sakkutooqarfeqarneq nalituujuvoq

Tamanna Tillie Martinussenip qaqeqqinniarpaa.

- Suleqatigiissitsisuni isumaqartuaannarnikuuvugut Nuummi mittarfik pioreersoq tallineqassappat eqqarsarnikippallaassasugut Nuup kujataani mittarfiliortoqarnissaanut naleqqqiullugu periarfissanik atorluaanngitsuussagatta sualummik USA-p NATO-llu akulerunnerisigut periarfissat nerrivimmut qallorneqartut misissorluaraanni. Nuup mittarfiata pioreersup tallineqarnissaanut periarfissalissuunngitsumut taarsiullugu Nuup Kujataani mittarfiliornissaq toqqartariaqarpoq aamma tulluarnerummat Kommuneqarfik Sermersuup Nuup avatinnguani qeqertanik atorluaanissaq pillugu pilersaarutigeriigaanut.

Nuuk taamaalilluni Kangerlussuup ullumikkut sakkutooqarneratut inissisimalersinnaalluni.

- Sakkutuunut nunatsinniittunut iluaqutaassaaq taamaasillunilu inuiaqatigiinnut kalaallisut nalitussaaq, nunarsuarmilu iitsinnut kiffaanngissuseqartunut demokratiskimillu ingerlasunut kiisalu nunatsinnut namminermut, mittarfiliorneq akileeqataaffigineqarsinnaammat allanit Namminersorlutik Oqartussat aningaasartuutissaraluannik ikilisaasussamik taamaasilluta nunatsinni immikkoortunut allanullu pingaartitatsinnut akissaqarnerulissaagut Kalaallit Nunaanni innuttaasut nuannaarutissaannik.