Suliffissaaleqisut ikileriaqqipput
Inuit 2.653-it apriilimi suliffissarsiortutut nalunaarsorneqarsimapput
Apriilimi inuit katillutik 2.653-it suliffissarsiortutut nalunaarsorneqarsimapput, taakkunannga 475-it nunaqarfinnit.
Taamaalilluni ukiup siuliani nalunaarsukkanut sanilliullugit suliffissarsiorlutik nalunaarsimasut 455-inik ikinnerupput. Illoqarfinni suliffissarsiortut ataatsimut isigalugit 367-inik ikileriarput.
Naatsorsueqqissaartarfik nittartakkamini taama allaaserisaqarpoq.
Suliffeqanngitsut ukioqatigiiani 20-nit 24-nut ukiullit amerlanerpaapput, taakkuani ukioqatigiiaat 404-gamik. Taakkunannga arnat 209-t suliffissarsiortuupput, angutillu 195-iullutik.
Nuummi suliffissarsiortut ukiup siulianut sanilliullugit 572-nit 475-inut ikileriarput.
Suliffissarsiorlutik nalunaarsukkat saqqummersinneqartarput kommuninut suliffissarsiorsimasut tunngavigalugit. Qaammammi inuk ataaseq suliffissarsiortutut naatsorsugaasarpoq, qaammatip ingerlanerani ataasiarluni arlaleriarluniluunniit nalunaarsorneqarsimanera apeqqutaatinnagu. Suliffissarsiortutut nalunaarsukkat qaammatikkaaartumik saqqummersinneqartarput.