Suliffissarsiortut ikileriartut
Inuit suliffissarsiorneq ajornartorsiutigalugu kommunimut saaffiginnittartut ikileriartut, Naatsorsueqqissaartarfik nalunaaruteqarpoq.
Piffissami 2. kvartal 2017-imit 1. kvartal 2018-imut ukiumut siulianut sanilliullugu suliffissarsiortut ikinnerupput.
Naatsorsueqqissaartarfimmit kisitsisit nutaat tamanna takutippaat. Suliffissarsiortut nalunaarsorfimmiinnerisa qaammatit sivisussusaanni appariartoqalaarsimavoq.
- 2. kvartal 2017-imiit 1. kvartal 2018-imut qaammammi ataatsimi imaluunniit qaammatini arlalinni inuit 7.593-it suliffissarsiortutut nalunaarsimapput, ukiup siuliani piffissami tassani inuit 8.215-it suliffissarsiortutut nalunaarsimasut, Naatsorsueqqissaartarfik allappoq.
2. kvartal 2017-imiit 1. kvartal 2018-imut suliffissarsiortutut nalunaarsimasut 54,5 procentii 4.135-nik amerlassusillit qaammammi ataatsimi qaammatiniluunniit pingasuni suliffissarsiortutut nalunaarsimapput, 9,7 procentii 736-nik amerlassusillit qaammatini quliniit aqqaneq-marlunnut suliffissarsiortutut nalunaarsugaasimallutik.
- 2. kvartal 2017-imiit 1. kvartal 2018-imut inuusunnerusut 18-nit 24-nut ukiullit 4,6 pct.-ii 84-inik amerlassusillit qaammatini qulinit aqqaneq marlunnut suliffissarsiorsimasutut nalunaarsorneqarsimapput. Suliffissarsiortunilu 45-init 59-inut ukiulinni 13,5 pct.-ii 302-nik amerlassusillit qaammatini quliniit aqqaneq marlunnut suliffissarsiortutut nalunaarsorneqarsimallutik, Naatsorsueqqissaartarfimmit oqaatigineqarpoq.