Kangerlussuup nunataani tammajuitsussarsiortitsilluni piniartitsisinnaanermut immikkut akuersissutinut Naalakkersuisut sapaatip akunnera kingulleq tunniussinerannut, Qeqqata Kommunia naammagisimaarinnippoq.

Immikkut akuersissutit tamarmik sumiiffimmi tammajuitsussarsiortitsisartunut tunniunneqarput, taamaalillutik immikkut akuersissutinik pissarsinermikkut ungasinnerusumut pilersaarusiornissamut aningaasaliinissamullu periarfissaqalerlutik.  Immikkut akuersissutinik pigisaqartut maannakkut nunaminertani piniartarfimmut attuumassutilinni illuaqqanik sanaartorniarlutik aallartisalerput. Piffissami matumani illuaqqat/unnuisarfiit nutaat arfinillit pineqarput - ilutigitillugulu immikkut akuersissutaatillit illuaqqat pioreersut annertusarnissaannut pilersaaruteqarput.

- Takornarialerineq Qeqqata Kommuniata inuussutissarssiornermut periusissiaani kivitsisuuvoq, uanilu annertuumik pingaaruteqarpoq, Kangerlussuup eqqaani issittumi avatangiisini kusanartuni inuunermut misigisassanik tammajuitsussarsiortitsilluni piniartitsisartunut neqerooruteqarsinnaanngoratta. Immikkut akuersissutinik periuseqarnikkut sumiiffimmi piniartut pinialuttartullu takornarialerisunngorsinnaanerannut periarfissippagut - taamaalillutalu inuussutissarsiuummik sumiiffimmi nukittuumik qulakkeerinnippugut, Qeqqata Kommuniani borgmesteri Malik Berthelsen oqarpoq.

- Kangerlussuaq takornariaqarnerup iluani annertoorujussuarmik periarfissalittut isigivarput - tassalu taanna periarfissaq maannakkut ineriartortitarput. Tammajuitsussarsiortitsilluni piniartitsinernut nunaminertanik immikkoortitsinitta saniatigut ilaatigut Kangerlussuup-nunataani illuaqqanik sanaartorsinnaanermut immaqalu hotellinik sanaartorsinnaanermut ammaassisumik kommunip pilersaarusiorneqarneranit tapiliussamik suliaqarnikuuvugut, soorlutaaq Kangerlussuup Sisimiullu akornanni nunaaannarmi aqqusinermik sanaartornissatsinni pilersaarutigut siuarsimasorujussuusut, taassuma pinngortitaq tikikkuminarnerulersissavaa ilutigalugulu Kangerlussuarmi takornarialerisunut pitsaanerulersitsinissamut uninngaannarnissamullu tunngavissamik pilersitsissalluni, Berthelsen oqarpoq.  

Tammajuitsussarsiortitsilluni piniartitsinermut immikkut akuersissutit quliusut sapaatip akunnera kingullermi Aalisarnermut, Piniarnermut Nunalerinermullu Naalakkersuisoqarfimmit tunniunneqarput. Tunioraaneq tamanut suliariumannittussarsiuussereernerup kingorna pivoq, tamatuma kingorna Qeqqata Komunianit, Aalisarnermut, Piniarnermut Nunalerinermullu Naalakkersuisoqarfimmit aamma Inuussutissarsiornermut Nukissiuuteqarnermullu Naalakkersuisoqarfimmit inuttaqartumik naliliinissamut ataatsimiititaliaq qinnuteqaatinik tiguneqarsimasunik ataatsimut nalilersuinikuulluni. Nalilersuineq nalilersuinermut tunngavigisat tunngavigalugit ingerlanneqarpoq: Suliassanut pilersaarut, suliamut ilisimasaqarneq misilittagaqarnerlu, aningaasalersuinissamut pilersaarut kalaaliunerlu.