Mittarfiliortiternissamut pilersaarummi periarfissatut ilusiligaq aallaaviusoq 1, Demokraatit tapersersorlugu aalajangiusimagaat, partiip ataasinngormat erseqqissumik oqariartuutigaa. Tassa Kangerlussuaq Narsarsuarlu heliportinngortinneqarnissaat kissaatigineqarluni.

Tamatuma kingunerisussaavaa Kangerlussuarmi Narsarsuarmilu mittarfinni sulisorpassuit, nunaqarfigisaminni suliffimminnik annaasaqarnissaat, immaqalu nuuttariaqalernissaat. Kisianni taakku innuttaasut suliffissaarunnavianngitsut, Niels Thomsen isumaqarpoq.

LÆS OGSÅ: Demokraatit: Kangerlussuaq aamma Narsarsuaq heliportiussapput

Ilaat heliportimi sulisinnaasut

- Assersuutigalugu Kangerlussuarmi suliffissat soorunami ikilissapput, tamanna avaqqunneqarsinnaanngilaq. Pingaarnertut nunaqarfiit taakku marluk mittarfeqarnermikkut piupput. Kisianni aamma nalunngilarput nunaqarfinni taakkunani najugaqartut amerlanerit tassaasartut, piffissami aalajangersimasumiinnaq suliffimmut atatillugu najugaqartartuusut. Aalajangersimaqqinnaartumik najugaqartut ikinnerussuteqartutut taaneqarsinnaapput. Mittarfimmi sulisut ilaat soorunami heliportimi sulinissaminnut periarfissaqassapput Kangerlussuarmi najugaqarnissartik kissaatigigunikku, Niels Thomsen oqarpoq.

Nunaqarfinni Kangerlussuarmi Narsarsuarmilu mittarfiit heliportinngorneqarnerini innuttaasut qanoq periarfissinneqarnissaannut aamma neqeroorfigineqarnissaannut apeqqummut, Demokraatit siulittaasuat ima oqarpoq:

- Siullermik sulisitsisut sulisullu akornanni atorfeqarnermut tunngasortaa isumaqatigiinniutaasussaavoq, politikkikkut toqqaannaq akuliuffigineqartussaanngilaq.

Taakku nunaqarfiit inukillillutik piffiit allat mittarfinnik pilersitsiffigineqarnerminni inunnik amerlanernik najugaqarfigineqalissappata, tassani kommunit aamma suliami akuusariaqarput. Kommunit pineqartut (Kommuneqarfik Sermersooq aamma Avannaata Kommunia, aaqq.) suliamut uunga siuttuullutik ujartuillutik aallartereernikuupput. Inissiat, ilaqutariit pineqartut meeqqerivinnut allanullu pisortat isumagisariaqagaannut tunngasut soorunalimi isumagineqanngitsoorsinnaannginnerat aamma qularinngilara.

LÆS OGSÅ: Mittarfinnut pilersaarut GE-p qularnartoqartippaa

Sunniutissat ajortut kisimik

Niels Thomsenip innuttaasut qisuariaatigisaat tupigusuutiginagit oqaatigaa, kisianni aamma illuanik sunniutissat pitsaasut sammineqanngissorisani apeqqusernartoqartippai.

- Uanga una eqqumiigivara, sooruna inuiaqatigiit aningaasaqarnerannut tunngatillugu sunniutissat pitsaasut sammineqanngitsut. Soorluli politikkukkut aalajangernerup qanoq sunniuteqarnerlussinnaanera kisiat sammineqartoq. Inuiaqtigiittut iluaqutit aamma suut pinnatassarinerigut qiviarneqanngilaq, taanna oqarpoq.

Mittarfinnut aaqqiissutissatut taamatut ilusilikkamik taamatut aalajangernissaq avaqqunneqarsinnaanngitsoq, inuiaqatigiit aningaasaqarnerannik misissuinerit takutikkaat, Demokraatit siulittaasuata oqaatigaa.

- Ukiut amerlanngitsut ingerlanerini Kalaallit Airports iluanaaruteqarluni ingerlalertussaavoq. Mittarfissualiorneq ingerlatseqatigiiffimmut tassunga aamma inuiaqatigiinnut iluaqutaasussaavoq, naak kisitsinermi sunniutit toqqaannaq kisikkuminaassinnaasut ilanngunneqarsimanngikkaluartut, soorlu takornarissat aningaasanik atuinerulernissaat assersuutigiinnarlugu.

Takornariaqarneq

Nunaqarfinni mittarfissuaqartuni takornariaqarnermut tunngasunik oqaaseqartoqallattaartoq Niels Thomsenip maluginiarsimavaa.

- Soorunalimi takornariaqarnermik suliaqartut nammineqqinnaaq aalajangissavaat, piorsaareersimanertik nangillugu ingerlaqqiinnassanerlutik imaluunniit allatut ingerlaqqissanerlutik.

- Qularinngilara takornariaq Kangerlussuarmukarusuttoq, suli Kangerlussuarmukarusussasoq. Kisianni takornariap piffinnut allanukarusuttup ajornannginnerusumik ornikkusutani ornissinnaalissavaa. Ullumikkullu piviusoq tassaavoq, takornarissat amerlanerpaartaat Kangerlussuarmukaratik allamukarusuttartut. Tassa imaappoq, amerlanernut iluaqutaassaaq, Niels Thomsen nangilluni oqarpoq.

Amerlanerusut iluaquserneqarnissaat

Nunaqarfinni taakkunani inuussutissarsiortut namminersortut pillugit qanoq sunniuteqarfigineqarnissaannut apeqqummut, Demokraatit siulittaasuat ima akissuteqarpoq:

- Suliffeqarfiit ataasiakkaat eqqartunngikkaluarlugit nunap aningaasaqarnera tamaat kivinnialerparput. Tassa imaappoq, nuna tamarmiusoq ataatsimut isigalugu iluaqusernialerparput. Tassuuna aningaasarsiorneq annerusoq pilersissavarput, takornariaqarnermut tunngasut eqqarsaatigissagutsigit aningaasarsiorneq annerusoq mittarfiliornikkut qulakkeertalissavarput. Taamaalilluni amerlanerit iluaquserneqassapput.

- Namminersulivinnissaq anguniarutsigu, taava aningaasarsiornikkut toqqammavigisat siuarsartariaqarpagut. Tamannalu pissappat, takornariaqarneq ineriartortissagutsigu angallannermi pissutsit ullumikkut naapertuutinngitsut aaqqissortariaqarpagut, Niels Thomsen oqarpoq.

Partiit allat ersarittumik nalunaartariaqartut

Nunatsinni partiit allat mittarfiliortiternissamut tunngasumik ersarissumik nalunaaruteqarnissaannik Demokraatit ujartuipput.

- Partiit ilaat, atinik taasaqanngikkaluarlunga, ilaasortaasa ilaat siunnersuummut tapersersuisut allat nangaasut. Tassani amigaatiginarpoq ersarissumik isummertoqarnissaa, una qulequtaq ukiorpassuarni eqqartorneqareertoq piaartumik aalajangiiffigisariaqaratsigu. Taamaammat partiit allat siuttuinut kaammattuivugut, uatsitulli ersarittumik nalunaaruteqassasut. Tapersersuinerlutik imaluunniit tapersersuinatik, Niels Thomsen naggasiivoq.